ICH Chvnigunt genant di Pu^echerinn hern Jacobs hausfrawe pey dem freythof des alten puriger ze Wells vergich offenbar mit dem brief vnd tv^enn chunt allen den, di in ho^ernt oder lesent, daz ich mit wol bedachtem mv^et vnd mit gv^etem willen meins svn Magensen dez Pu^echer vnd mit ander aller meiner erben gu^eten willen vnd wart gesaczzt haben vnser gu^et ze Hornarn gelegen in Peinbanger pharr mit alle dev, vnd dar zu^e geho^ert, versu^ocht vnd vnuersu^ocht Wernharten von Hawzma^enyng ze Lincz vnd seiner hausfraw^on Margreten vnd iern erben, vnd daz vnser rechcz vreys aygen ist, fu^er drew vnd zwainczk pfunt pfenning alter wienner mv^enzz, der wier gar vnd gaenczleich von in gewert sein also mit der beschayden, daz ich oder mein erben von in lo^esen schullen daz vor genant gu^et an sand Gorigen tag, der schierst chv^onftyg wirt vor jnrr acht tagen oder hin nach jnrr acht tagen vnd schullen sev vns di losung nicht vercziehen. Wa^er, daz ich oder mein erben dann nicht lo^esten, so schullen wier dar nach alle iar iaerleich lo^esen an dem vor genanten sand Go^erigen tag aber, alls vor geschriben stet. Ich schol auch vnd mein erben dez saczz ier gewer sein, also lancz recht ist ob der Ens. Waer auch, daz in an der gewerschaft icht ab gieng, daz schullen sev haben dacz vns vnd dacz vnsern trevn vnd auf ander vnser hab, di wier indert haben versu^echt vnd vnuersu^echt. Vnd swenn sev dez saczz nicht lennger jnn gehaben mo^echten oder wollten, so schullen sev iern saczz verseczzen vnd verchauffen vnd ier pfenning da von becho^emen mit vnserm gu^etleichen willen vnd wart, so sev na^echst vnd pest mo^egen. Vnd dar v^ober ze ainem warn v^erchu^end gib ich ob genantev Chv^enigunt in den prief versygellt mit meins svn Magenzen dez Pu^echer anhangvnden insygel; vnd ze ainer pezzern sicherhait mit meins lyeben wiert hern Jacobs anhangvnden insygel iem an schaden, dar vnder ich mich verpunten han alles daz sta^et ze behallten, daz an dem brief geschriben stet, der geben ist nach Christes gebu^erd v^eber drewczzehen hvndert iar vnd dar nach in dem fv^emf vnd fv^enfczkisten iar dez na^echsten eritag vor pfingsten.

Source Fulltext: OÖUB 7 (Wien 1876), S. 415f., Nr. 404