Ich Stephan der Liechtenwinchler vnd all mein erben wir vergehen offenleich an dem prief vnd tuen chuntt allen den, dew in sehent oder horent lesen, daz wier cze chauffen haben geben vnserm lieben ochaim Larentzen dem V/etzinger vnd seiner hawzfrawn vnd allen iren erben vnser wis genant daz Liechtwisel vmb fumf phuntt allter wienner phenning, der wir gantz vnd gar gericht vnd gubert seinn, vnd wa^er, daz iem cha^em vnd pezza^er rechtt haben welt vnd sew dar vmb anspra^eche, so geben wier in sechs phunt tze eim rechten satzz dar auf vnd schulten wier dann chaufs vnd satzz ier recht guber sein an aller der stat, vnd in dez not geschiecht nach lantz rechtt ob der Ens. wa^er aber, daz wier in dew gberschaft indert vertzugen, von welcherlay sache daz wa^er, waz sew dez schaden naemen, den ier ains gesprechen mo^echt pey seinn trewn an ayde, den schullen wier in abtuen gantz vnd gar vnd schullen sew daz haben dacz vnsern trewn vnd auf allen vnser hab, (wo) wier dew haben versuecht vnd vnuersuechtt. vnd daz in dew red vnd gulub allew sta^et vnd vnu erchert weleib, geben wier in den prief versigellt mit meim anhangundem insigell vnd mit meins lieben freuntt anhangundem insigell hern Dietreichs dez Schiuer iem an schaden. Der prief ist geben nach Christi gepurd vber drewtzehen hundert iar vnd im fumf vnd funfczkisten iar an sant Thomans abent.

Source Fulltext: OÖUB 7 (Wien 1876), S. 430, Nr. 421