Wir Albrecht von Gots gnaden hertzog ze Osterreich ze Steyr vnd ze Kernden embieten unserm getrewn dem richter dem rat und den purgern ze Steyr unser gnad und als gut. Wir welln ernstlich, waz gutes in ewern purchfrid gelegen ist, daz vor mit ew an der schatzstewr geliten hat, daz daz noch mit ew leid und daz ew nyemandn daran irre. Auch empfelhe wir ew, daz ir in dem purchfrid dasselbes niemandt lazzet rayval noch ander ungewonleich wein schenken, wo ir daru^eber rayval oder ander ungewonlich wein da begreifft, des sult ir ew von unsern wegen underwinden untz an uns. Geben ze Wienn an mitich vor sand Elspeten tag, nach Christi gepurde im dreutzehnhundert funffundfunffzigisten jar.

Source Fulltext: OÖUB 7 (Wien 1876), S. 425, Nr. 416