Ich Vlrich der Messrer, mein hausfrawe vnd alle vnser erben veriehen offenwar an disem prief allen den di in sehent oder ho^erent lesen. daz ich mich mit verdachtem mu^ot vnd nach erberiger laev^ot rat verrichtt han mit hern Christan pharrer ze Schalihen vmb dev ansprach di er hintz vns ha^et von der wydem wegen ze Matichouen gaentzlich an alls gever; vnd nomen vns paidenthalben drey schydman nach dez burkgrauen rat ze Fridburch Wernhern den O^eder, Chunrat den richter ze Fridburch, Chunrat den Pern, di chomen v^eberain, daz ich egenanter Vlrich mein hausfrawe vnd vnser erben chain ansprach fu^erbas haben schu^ellen hintz der vorgenanten wydem ze Matichouen weder auf haus noch auf stadel, nu^er daz wir gefessen den trayd, der zv dem iar dar auff gewachsen ist; vnd schol auch den andersvva nicht fu^eren mit allen nu^etzen vnd auch etzen nu^er auf der selben wydem. Wir veriehen auch daz wir dev wydem paevleich lazzen schull/een ze holtz vnd ze veld vnd schullen sei verrichten mit samen vnd mit ardhaev^e nach trewer paev^elaev^et rat. Daz di taydinch hern Christanen pharrer ze Schalihen vnd allen seinen nachchomen staet vnd vnzebrochen beleibe, geben wir in disen prief versigelten mit dez erbern mannes hern Walchu^ens dez Hadrer anhangunden jnsigel, der zden zeiten phleger was ze Fridburch der daz durich vnsrer pet willen angelegt hat im an schaden, dar vnder wir vns verpinten mit vnsern trewn an aydez stat allez daz staet ze haben vnd ze volfu^eren daz vor verschriben stet, wan wir aygens jnsigels nicht enhaben. Der prief ist geben nach Christ gebu^ertt drevtzehen hunndert jar darnach indem sechs vnd fu^emftzigstem jar an sand chayser Hainreichs tag.

Source Fulltext: OÖUB 7 (Wien 1876), S. 467f., Nr. 460