Wir der erber rat vnd div gemain der erbern stat da ze Ens tu^en chunt mit disem brief, daz wir durich merung des gotsdiensts vnd durich andacht di wir pilleich haben zu der grozzen hailichait Gots leichnams, in des eren der alter gelegen pey der tuer in vnserr heiligen pharchirichen ze Ens gestift ist, vnd auch durich vleizzig pet vnsers verweser maister Heinreichs chorherren ze Passaw vnsers techents ze Ens dez hochgeboren fursten vnsers genedigen herren herczog Albrechts ze Osterreich ze Steyr vnd Kernden kanczler dezselben alters stifter, di andacht trew vnd lib getan haben vnd tun mit disem brief, daz der chapplan der den selben alter ieczund innhat oder wem er hinfu^er verlichen wirt oder wer in verwest, allev burgerrecht mit vns vnd als vnser igleicher ewichleichen haben sol vnd hat in vnser stat ze Ens vnd auf wazzer vnd auf land vnd an allen staten, vnd vnser burger ist vnd sein sol, vnd sein wein traid vnd ander sein hab die er hat oder gewinnet zu dem selben alter, vertu^en verschenkchen verfu^eren oder verchauffen mag in vnserm recht als ain ander burger von Ens, vnd sol in noch sein hab niemant irren noch engen, vnd sullen auch wir denselben chapplan wer der ist vnd hinfu^er wirt vnd sein hab versprechen vnd verantwu^ertten, wo im dez not geschicht in vnser stat oder daranzz, an mautsteten an dingsteten vor der herschaft oder wo iz ist als einen andern bv^erger von Ens, vnd sol derselb chapplan oder wer an seiner stat den alter verwest, vnser stat ze Ens vnd vns ze helf raihn vnd geben all iar in den weinacht veirtagen ein phunt phening wienner muniz in vnser pu^echssen ze Ens vnd nicht mer, vnd sol er vnd sein hab, iz sei vrbar oder gu^elt oder varund gu^et, da mit ledig sein von aller vordrang stevr hilf lehen erung wacht pezrung oder waz aischung von der herschaft wegn oder von vns selben ist oder du^erft waer. Ist aber daz er hab hiet von seinem erib oder von andern sachen dev nicht geho^ert zu dem alter vnd dez alters nicht ist noch dovon chomen waer, do sol er von leiden mit den burgern als zeitleich ist, doch sol im auch gu^etleich darinn beschehen daz er nicht weswaert werd fu^er einen andern. Er sol auch durich des purgerrechtes willen nicht verliesen seinev gaistleichen recht. Hab iemand hincz im zesprechen vm gelt oder vm tat oder vm welich sach ez ist, da sol er recht vm suchen vor seiner gaistleichen maisterschaft oder vor dem techant ze Ens, vnd sol auch derselb chapplan oder sein verweser daz da von leiden vnd tu^en, alz ander phaffen tu^ent. Daz di red vnd dyu wandlung also stet vnd ewichleich vnzebrochen beleib, darvbyr geben wir der erber rat vnd div gemain ze Ens dem vorgenanten chapplan vnd seinen nachchomen disen offen brief versigelten mit vnserm grossen inigel der stat ze Ens. Der brief ist geben ze Ens an sand Margreten tag nach Christs gepu^erd dreuzehen hundert iar darnach in dem sechs vnd fumfzigisten iar.

Source Fulltext: OÖUB 7 (Wien 1876), S. 466f., Nr. 459