Ich Wulfinch vnd ich Chu^onrat paid bru^eder von Goldekk vnser hausfrawn vnd all vnser erben veriehen vnd tu^en chunt offenbar an dem brief allen den di in ansehent oder horent lesen, daz wir vnsern lieben gena^edigen herren graf Vlrich von Schawnberch ze purgen versaczt haben hincz Hainrich dem Tobelhaimer purger ze Passawe hincz seiner hau^osfrawn vnd hincz allen iern erben vmb achthalb hundert pfunt wienner pfenning, di der vorgenant Hainrich der Tobelhaimer innemen sol von dem ampt ze Gmunden di na^echsten funf quattemmer, zue einer igleichen quattemmer anderthalb hundert pfunt wienner pfenning anzehefen zue der na^echsten chottemmer in der vasten. Loben vnd gehaizzen wir vnserm vorgenanten gena^edigem herren graf Vlrichen von Schawnberch mit vnsern trewen an aidez stat, daz wir in vmb di vorgenante porgschaft ledigen vnd losen sullen gar vnd gancz an allen seinen schaden. Ta^eten wir dez nicht, swittanen schaden er dez na^em den er bei seiner beschaiden gesagen mag, den sullen wir im abtu^on gar vnd gancz vnd sol er vnd sein erben den selben schaden haben auf vns vnd vnsern trewn vnd darzu^e auf aller vnsrer hab wa wir di haben oder wi di genant ist besu^echt vnd vnbesu^echt. Vnd darvber zu^e einem warn vrchund geben wir im disen offen brief mit vnsern anhangunden insigelen versigelten, der geben ist an sand Thomas tag dez zwelif poten, do man zalt von Christez gepu^ert drewczehen hundert iar darnach in dem sechs vnd funfzigistem jar.

Source Fulltext: OÖUB 7 (Wien 1876), S. 479, Nr. 471