Ich Heinrich Sluntwegkk ich Elspet sein hausfrowe ich Wolfganch sein su^en vnd alle vnser erben wier veriehen offenleich an dem prief vnd tun chvnt allen den die in sehent oder ho^errent lesen di nu sint oder her nach chu^emftich werdent, daz wier mit wolbedachtem muet vnd mit aller vnsrer erben guetleichem willen ze den zeiten do wier ez wol tu^en mo^echten, recht vnd redleich haben ze chauffen geben dem erbern herren hern Reinprecht von Walse vnd seiner hausfrowen vnd allen ierrn erben vnsern ho^ef gelegen pei der chirchen dacz sand Jo^ergen auf dem ybsueld mit allen nu^eczen vnd dar zu^e geho^ert wie die genant sind, versuecht vnd vnuersuecht, gestifft vnd vngestifft, ze holcz ze veld, da man von dient ze purchrecht alle jar an sand Jorgen tag auf vnserer vrowen alter hincz sand Jo^ergen zweilf wienner phenning, vnd ein lehen auf dem Chyenperg daz vnser freys aygen gewesen ist, an aecht phunt vmb hundert phunt wienner phenning der si vns gancz vnd gar verricht vnd gewert habent ze rechten tegen an allen schaden. Wier haben in den egenanten ho^ef auf geben vnd gemacht mit purchherren hant. Wier sein auch des vorgenanten ho^effs ier scherm vnd gewer fur alle ansprach vnd als purchrechtes vnd aygens recht ist in dem lande ze O^esterreich. Naemen si da von schaden mit recht, den selben schaden schullen si haben auf vns vnd auf aller der hab die wier haben wo wier die haben wier sein lembtich oder to^ed. Daz die red also staet vnd vnuerchert beleibe darvber geb wier den prief ze einem offen vrchund der warheit versigelt mit vnsern anhangvnden insigelen, wand ich Elspet niht insigels han, so verpint ich mich vnder meins pru^oder insigel Ruedolfs Pu^echaive die red staet ze behalten mit meinen trewen an allez gevaer; vnd ist des zevg der erber ritter her Jans von Sewsenekk mit seinem anhangunden insigel. Der prief ist geben do man zalt von Christes gepu^erd drevzehen hundert jar darnach in dem aecht und fu^emfzzichgistem iar des su^entags nach mitter vasten.

Source Fulltext: OÖUB 7 (Wien 1876), S. 565f., Nr. 553