Ich Gu^enther zu den zeiten spitaler des spitals an dem Piern vergich vnd tu^en chunt allen den di disen brief lesent oder ho^erent lesen di nu lebent vnd hernach chu^enftich sind, daz ich mit gu^etem willen mit verdachtem mu^et zu der zeit do ich ez ze recht wol getu^en mochte, recht vnd redleich verlihen haben dem erbern herren hern Otackchern dem Rorer vnde seiner hausurowen vron Katrein nur ze leibgeding zü ir baider lebta^egen einen hof gelegen in dem Ga^erstenthal, haizzet die Staynwant, vnd alles daz daz darzu geho^eret, es sei gestift oder vngestift, versucht oder vnuersucht, swie so daz genant ist, mit allen den nu^etzen vnd rechten als in Dietreich der Pu^edminger vnd sein hausurow vrow Chunigunt von mir vnd von dem egenanten meinem gotshaus ze leibgeding gehabt habent vnd die auch mir dazselb ir leibgeding vnbetwungenthleich wider auf gegeben habent also mit ausgenomener rede, daz der egenant her Otakcher der Rorer vnd sein hausurowe vro Katrei den vorgenanten hof vnd alles daz daz darzu^e gehoret als vor verschriben ist, in nutz vnd in gewer suln inne haben vnuerchumert vnd vngeergert vntz an ir baider tode als leibgedings recht ist, vnd nach ir baider tode, so sol mir vnd meinen nachchomen, swer denne dez egenanten gotshaws spitaler ist, vnd dem selben gotshaws der vorgenant hof vnd alles daz daz darzu^e gehoret als vor verschriben ist, gaentzleich aller ding wider ledich sein in alle dem rechten, als er vor zü dem egenanten gotshaws geho^eret hat also, daz denne fu^erbas nach ir baider tode chainer irr erben auf den selben hof noch auf alles daz daz dar zu^e geho^eret nichts ze vodern noch ze sprechen sol haben weder vmb vil noch vmb wenig an ir varund güt, daz her Otakcher der Rorer vnd sein hausurow vrow Katrey denne auf dem egenanten hof habent, des suln si vollen gewalt vnd recht haben ze schaffen vnd ze geben swem si wellent an allen ierresal. Vnd daz disew sache fu^erbas also staet vnd vnzerbrochen beleibe, darvber so gib ich obgenanter Gu^enther dem vorgenanten erbern herren hern Otakchern demRorer vnd seiner hausurowen vron Katrein disen brief zu einem warn vrchu^ende diser sach versigilten mit meinem aygen insigil vnd mit des egenanten meins gotshaus insigil des spitals an dem Piern. Der prief ist geben nach Christes geburt drewtzehen hundert iar darnach in dem acht vnd fumfczgisten iar des nachsten eritags vor mitter vasten.

Source Fulltext: OÖUB 7 (Wien 1876), S. 563f., Nr. 551