Ich Symon von Rooch vergich vnd tuen chund allen laewten di den prief sehent lesent oder lesen ho^erent, vmb di zwen ho^ef di gelegen sind vnd genannt datz Herrenrooch in Rewthaimoer pfarr vnd der ainer ist mein vnd meiner erben vreys aygen vnd der ander vnser recht lehen von dem gotshaus ze Traunchirchen, daz ich di selben ho^ef paid mit allen den nu^etzen eren vnd rechten di darzue geho^erent ze dorff ze holtz vnd ze veld, besuecht vnd vnbesuecht mit wolbedachten muet mit wille mit rat vnd mit gvnst meiner hausfrawen vnser paider erben vnserr pezsten frevnt vnd aller erben mit gesampter hant ze der zeit do ich ez wol getuen macht han recht vnd redleich geben ze chauffen dem erbern beschaiden mann Jansen dem Mu^elbanger vnd seinen erben ledichleich aus vnsrer nutz vnd gewer in di iren vmb dreizzich pfunt vnd vmb hundert phunt phenning wiener mv^enzz, der wir i^ech vnd mein erben sein von in gantz vnd gar gewert vnd verricht also mit der beschaiden, daz si von dem ainen ho^ef der da aygen ist ierleich schu^ellen raihen ze zwain taegen zu dem gotshaus datz Gaesten sechtzig phenning alter wienner mv^enzz ze selgeraet, daz mein vordern selig durich irer sel willen habent darauff geschafft vnd nicht mer, vnd auch in so^elcher maynung, daz wir ich vnd mein erben der obgenanten ho^ef paider ir gewer schu^ellen sein fu^er alle ansprach an aller der stat da in sein durift geschiecht nach des landes recht ob der Ens Taet wir des nicht, swaz si des dann schaden naemen den ir aines pei seinen trewen mo^echt gesprechen, den selben schaden zu sampt dem haubtguet schu^ellen si haben auf aller anderr vnsrer hab di wir haben besuecht vnd vnbesuecht, vnd schu^ellen sein da von becho^emen wellent si di mu^egen beraihen, daz wir dhainerlei widerred schu^ellen noch mu^egen dakegen gehaben. Daz loben wir in mit vnsern trewen ze laisten vnd staet ze haben angeuaer. Vnd darv^eber zu einem vrchv^end der worhait gib ich vorgenanter Symon den prief fu^er mich vnd fu^er all mein erben den êgenanten Jansen dem Mu^elbanger vnd seinen erben mit meinem anhangunden jnsigel versigelt, vnd zu einer pezzern sichherhait vnd zevgnu^ezz der vorgeschriben handlung aller versigelt mit meins lieben o^ehaim Fridreichs des Chrezzling vnd mit meins lieben swager Jansen den (sic) Schu^etzen anhangundem jnsigeln, mit der will vnd rat di gegenwu^errtig wandlung alle ist geschehen. Der prief ist geben nach Christs gepu^erd drewtzehenhundert iar dar nach in dem aecht vnd fv^enftzigisten iar an sand Benedicten tag in der vazsten.

Source Fulltext: OÖUB 7 (Wien 1876), S. 566f., Nr. 555