Wir Albrecht von Gottes genaden hertzog ze Osterreich ze Steir vnd ze Kernden enbieten vnssern getrewn allen vnsern purigern gemainleich ze Enns ze Lynncz ze Welss ze Steir vnd ze Gmvnden vnsser gnad vnd alles gut, wir gebieten ew gar ernstleich vnd wellen, ist daz ew oder di ewrn Reinprecht von Walsse von Enns ichtes weswa^eret oder nottet von der stewr wegen di er haben wil von ewrn gutern auf dem lant di von im lehen sind, daz ir ew dann des seczet vnd widerhabet vnd di sein auch darvmb aufhabet wa ir di an chomen muget in vnssern vorbenanten steten, vnd des mit nichte lasset, wann wir daz dem vorgenanten Reinprechten von Walsse auch ze wissen haben getan. Geben ze Wienn am phincztag in der ossterwochen anno domini M. ccc.LVIII.

Source Fulltext: OÖUB 7 (Wien 1876), S. 570, Nr. 557