ICH Erhardt der Peck zu Maurkirchen mein hawsfraw vnd vnser erben veriehen offenbar mit dem brieff vmb die hofstat die wir haben von vnser frawen vnd herrn Seyfrid vnserm pfarrer ze Maurkirchen, die da leit ze na^echst Jacklein dem Pecken, der wort das er vns erlaubt hat dar auff wider zu pawen, haben wir im verhaissen mit vnsern trewen, das wir nicht lenger darauff zimmeren sullen dann vierczick schuch nach der leng die er vns selb ausgemessen hat vnd gezaigt, vnd nicht hoher dann die stuben auff die erd vnd das oberzimmer mit dem rauen lig auff der stuben. Wir sullen in auch friden zwischen vnser vnd seins garten vnd hofs mit ainem guten frid das er kainen schaden von vns noch von vnsern anbalten durch den frid nicht nem. Wer aber das wir das indert vberfuren mit dem zimmer oder mit dem frid, so sullen wir alle vnsre recht an der obgenanten hoffstat gar vnd gancz uerborcht vod uerloren haben. Vnd des zu vrchundt geben wir im den brieff versigelt vndter des erbern mans hern Conradt des Notleichs von Vorstorn anhangenden jnsigel den wir besunderleich darumb gepeten haben das er vns zu gezug der sach sein jnsigel an den brieff gelegt hat. Geben nach Kristes gepurdt drewzehen hundert jar vnd in dem acht vnd funffczigisten an sant Blasen tag.

Source Fulltext: OÖUB 7 (Wien 1876), S. 555, Nr. 542