Wir Albrecht etc. veriehen vnd tu^en chunt vmb die tausent pfunt wienner pfenning die vns vnser lieber getrewer Eberhart von Chappell berait gelihen hat vnd darvmb wi^er im Peilstain gesaezt hetten, vnd vmb die acht hundert vnd sechs vnd nevnczig guldein vnd ouch vmb die hundert phunt wienner phenning der wir im schuldig waren von des dienstes wegen den er vns tet wider die von Zurich dafur wir in behauset haben gen Ens, daz wir vnsern willen vnd gvnst darczu geben vnd geben ouch mit disem brief daz er die erbern vnd geistleichen die chlosterurawen des gotshavs ze Pulgarn auf die vorgenante behausung ze Ens geweist hat mit seinem gescheftbrief alles des geltes daz er darauf hat vnd daz vor benant ist also, daz si daz dar auf haben sullen nach der brief sag die der vorgenant Eberhart von Chappell daruber von vns hat vnd ouch alls der gescheftbrief sait den si von demselben von Chappell daruber habent, des geben wir etc. Datum Wienne sabbato ante purificationem lviij.

Source Fulltext: OÖUB 7 (Wien 1876), S. 552, Nr. 540