Nos Hermannus diuina permissione prepositus totumque capitulum canonicorum regularium ecclesie sancti Mychaelis in Newenkirchen ordinis sancti Augustini Babenbergensis dyocesis tenore presencium publice recognoscimus et fatemur, quod nos matura deliberacione prehabita veram et legittimam confraternitatem perpetuis inuiolabiliter temporibus obseruandam mutuo contraximus cum venerabili in Christo patre ac domino Wernhero preposito suoque capitulo ecclesie in Ranshouen prefati ordinis Patauiensis dyocesis expresse in hunc modum, quod generaliter omnia que in confraternitatibus nostri ordinis pie ac debito requiruntur videlicet in fratrum ex hac vita decedencium vigilijs annotacionibus ceterisque pietatis operibus iuxta consuetudines antiquitus approbatas promittimus adimplere, confratres eorum viuos si nobis quacumque sui monasterij necessitate transmissi fuerint colligere et equanimiter tanquam nostris confratribus ex diuersis nostri monasterij prouentibus medio tempore prouidere. Preterea si quisquam ex eorum confratribus subterfugiendo sui prelati indignacionem seu cuiuslibet discordie rigorem ad nos ob spem graciose reconciliacionis refugium haberet, ipsum tamdiu colligere volumus quousque nostris intercessionibus plenariam poterit gratiam adipisci. In quorum omnium testimonium presentes ipsis dedimus literas sigillorum nostrorum appensione roboratas. Datum et actum anno domini M°.CCC°.L° viij/m. in crastino beati Georij martiris.

Source Fulltext: OÖUB 7 (Wien 1876), S. 575f., Nr. 563