Ich Hainreich der Vrei vnd ich Dorothe sein hausvraw vnd all vnser erben vergehen vnd tu^en chund allen den di den prief sehent oder ho^erent lesen, daz wier mit wol bedachtem mu^et czu der czeit da wier es wol getu^en mochten, recht vnd redleich gesatzt haben hern Chunraten dem pharrer dacz sand Thoman vnd allen seinen nachchomen vnd auch dem gotshaus ze Walthausen czwen vnd ein halb phunt phenning geltes rechter herren gu^olt, di vnser vreis aigen gewesen sind vnd gelegen sind in sand Thomans pharr au drin lehen, daz ain haizzt datz dem Swaben, daz ander auf der O^ed, daz drit leit auf dem perig datz sand Thoman, vnd auch auf drin hofsteten daselbs, vmb fumftzig phunt wienner phenning, der wier genczleich gewert sein an allen vnsern schaden also, daz si di vorgenanten güter nu^oczen vnd haben schullen mit allen den rechten vnd nuczen als wier seu in aygens gewer gehabt haben. Wier schullen auch der vorgenanten gu^eter ier gewer vnd scherm sein nach landes recht in O^esterreich. Teten wier dez nicht, waz si dez schaden nemen den si pei iren trewen gesagen möchten, den schullen wier gaenczleich ablegen vnd daz schullen si haben auf aller vnser hab die wier haben in O^esterreich. Dez gib ich der vorgenant Hainreich der Vrey den gegenburtigen prief mit meinem insidel vnd mit der erbern ritter hern Otten von Tanpruk vnd mit Jacobs dez Vrein meins pru^eder insideln, di durich meiner pet willen mit iren insideln der wandlung geczeug sind. Darczu^e sind auch geczeug her Fridreich zu den czeiten pharrer datz Sechsen vnd Jans der Chramer vnd Hainreich der Schreiner dacz sand Thoman. Der prief ist geben nach Christi pu^erd dreuczehen hundert jar darnach in dem acht vnd fumftzigisten iar an san lo^erigen tag.

Source Fulltext: OÖUB 7 (Wien 1876), S. 573f., Nr. 561