Ich Ortolf der Haeuttaler vnd ich Agnes sein hausurow^e vnd ich Chunrat der Haeuttaler sein pru^eder wir vergehen vnd tu^en chunt allen den die disen brief lesent oder horent lesen die nu(e lebent vnd hernach chunftich sint, daz wir mit aller vnser erben gu^etem willen vnd gunst mit verdachtem mu^et vnd mit gesampter hant zu^e der zeit do wir ez wol getu^en mo^echten, vnd mit vnsers lehenherren hant dez edeln hochgeborn fu^ersten herczog Ru^edolfs ze O^esterreich ze Steyer vnd ze Chaernden verchawft haben vnsers rechten lehen, daz wir von im ze lehen gehabt haben von rechter ehafter not, von dez golts wegen daz wir hincz den juden gelten suln, acht vnd vierczich meczen waicz gelts vnd acht vnd vierczich meczen habern gelts vnd sechs schilling wienner phenning gelts, alles gelegen ze Haeuttal auf zwain ganczen lehen vnd auf alle dew^o, vnd darzu^e geho^eret ze velde vnd ze dorffe swie so daz genant ist, da zu^e den zeiten aufgesezzen sint die holden die hernach an disem brief geschriben stent. Dez ersten Vlreich der Chnaebel auf einem halben lehen Vlreich der Mair auf einem halben lehen. Ott der Weizz vnd sein mu^eter auf einem halben lehen, vnd Ott der Raebel auf einem halben lehen. Die vorgenanten gult alle haben wir recht vnd redleichen verchaw^eft vnd geben mit alle den nuczen vnd rechten alz wir si in lehens gewer her pracht haben vmb vierczich phunt wienner phenning, der wir gar vnd ga^entzleich gewert sein, dem erbern ritter hern Pu^ercharten dem Chnaewzzer vnd seinen erben fu^erbaz ledichleichen vnd vreyleichen ze haben vnd allen irn fru^emen da mit ze schaffen verchawffen verseczen vnd geben swem si wellen an allen irresal. Vnd habent auch si die selben gult vmb die vierczich phunt phenninge geledigt vnd gelo^est von Eysakchen dem juden von Lo^e dem wir die selben gult mit gesampter hant versaczt heten. Vnd sein auch wir ich Ortolf der Haeuttaler vnd ich Agnes sein hausurow^e vnd ich Chu^enrat der Haeuttaler sein pru^eder vnd alle vnser erben vnuerschaidenleichen der vorgenanten gult aller dez egenanten hern Pu^ercharts des Chnaewzzer vnd seiner erben recht gewern vnd scherm fu^er alle ansprach als lehens recht ist vnd dez landes recht ze O^esterreich. Wer aber daz si mit recht an der selben gult icht chriegs oder ansprach gewu^ennen, swaz si dez schaden nement daz suln wir in alles ausrichten vnd widerchern an allen irn schaden, vnd suln auch si daz haben auf vns vnuerschaidenleichen vnd auf allen vnserm gu^et daz wir haben in dem lande ze O^esterreich oder swo wir ez haben wie so daz genant ist wir sein lebentich oder tode. Vnd daz diser chawf furbaz also staet vnd vnzerbrochen beleib, darvmb so geben wir ich Ortolf der Haeuttaler vnd ich Agnes sein hausurow^e vnd ich Chu^enrat der Haeuttaler sein pru^eder dem obgenanten hern Pu^ercharten dem Chnaezzer vnd seinen erben disen brief ze einem warn vrchunde vnd ze einer ewigen vestnu^enge diser sache versigelten mit vnserm insigiln vnd mit V/elreichs insigil dez Stekchen zu den zeiten richter ze Lo^e, der diser sache gezew^eg ist mit seinem insigil. Der brief ist geben ze Wienne nach Christes gebu^erde drewczehen hundert iar darnach in dem acht vnd fu^emfczgistem iar an vnser vrown abent zu der schidunge.

Source Fulltext: OÖUB 7 (Wien 1876), S. 591f., Nr. 579