Wir Rudolf von Gottes gnaden hertzog ze O^esterreich ze Steyr vnd ze Kernden tu^on chunt vmb die ächt vnd viertzig metzen waitz geltes vnd a^echt vnd viertzig metzen habern gelts vnd sechs schilling wienner phenning gelts alles gelegen ze Hevtal auf zwayn gantzen lehen vnd auf alle dem daz darzu^o geho^ert daz alles lehen von vns ist, daz wir die aygenschaft derselben gult auf denselben zwayn lehen vnserm getrewn Purchart dem Chnevzser durch siner bett willen geben haben, daz er dieselben gu^elt durch Got vnd durch seiner sel hail willen ledichlich vnd vreylich geben mag wo hin er wil ane alle irrung, vnd darumb daz wir im die gnad getan haben, hat er vns seines rechten aygens aufgeben seinen hof ze Payrhof gelegen in sand Thomans pfarr im Achland, vnd hat denselben hof hinwider von vns ze lehen emphangen, daz derselb hof vnd was darzu^o geho^ert, fu^erbas dezselben Purchart des Chnevzser vnd seiner erben lehen sein sol von vns vnd von vnsern bru^edern vnd von vnsern erben. Mit vrchund ditz briefs, der geben ist ze Wienn an mittichen vor sant Ma^erteins tag, nach Cristes gepurde tausent drevhundert vnd fu^enfzig jarn vnd darnach in dem achten jare.

Source Fulltext: OÖUB 7 (Wien 1876), S. 602, Nr. 591