Wir Rudolf etc. tun kunt, daz wir vnserm getrewn lieben Jansen dem Trawner an dem ayndlef hundert vnd Ix. phunt phenning die er vnserm lieben herren vnd vatter selig herczog Albrechten zu^o sinen vnd vnsern notdu^erften an der losung zder Vreinstat vnd der vest Chlingberg berait gelihen hett, nicht mer gelten vnd schuldig sein den vj. hundert vnd x phunt phenning wienner, vnd hab wir yn vnd sein erben dar vmb behovset daselbs zder Vreinstat, swenn sich di vier jar endent vnd die auz gent als des vorgenanten vnsers herren vnd vatter brief sait den derselb Trawner darvmb hat, von demselben tag zwai gancze jar nach einander also, daz si sich selben in den zwain jaren die di lesten sind nach den vorgenanten vier auz gennden jaren, von den nuczen zder Freinstat vnd ze Chlingberg richten vnd weren sullen der vorgenanten vj. hundert vnd x. phunt phenning, das ist vf ein iesleich jar iij. hundert vnd fumf phunt phenning, vnd swenn dieselben lesten zwai jar auz sind, so sullen si vns vnd vnsern prudern Fridrich Albrecht vnd Leupolt herczogen oder vnsern erben die vorgenant stat Vreinstat vnd die vest Chlingberg ledichleich wider antwurten an alle widerred. Wir sullen si ouch die egenanten zwai jar daselbs nicht enthousen noch verkeren in dhainem weg. Si sullen ouch dieselbe behousung fu^er die egenanten vj. hundert vnd x phunt phenning dieselben zwai jar mit allen nuczen vnd rechten die dar zu^o geho^erent innhaben vnd niezzen, als si die von Walsse habent inngehabt. Ez ist ouch gerett daz si die obgenanten stat vnd vestt vnd leut vnd gu^et daselbs die vorgeschriben zwai jar vnuerdorbenlich inne haben vnd daz si vns vnd vnsern vorgenanten prudern vnd vnsern erben da mit wartund vnd gehorsam sein, vns vnd die vnsern dar in vnd dar auz ze lazzen an yrn schaden wenn vnd wie oft vns dez not geschieht. Mit vrkunt dez briefs etc., geben ze Lyncz am eritag vor dem heiligen antlaz tag anno lix°.

Source Fulltext: OÖUB 7 (Wien 1876), S. 643f., Nr. 632