Ich Chunrat der Schu^ecz von der Linden ich Alhait sein hausfrau und dar czu alle unser erben wier veriehen daz wir ze chauffen haben geben unsern hof dacz der Linden den nidern hof, der gelegen ist in Weizzenpekcher pharre und recht lehen ist von unsern genedigen herren von Chappelln, und den zehent der auf dem vorgenanten hof ist, des zway tail unser ist und alles daz durich recht in den hof geho^ert versu^echt oder unversu^echt, also haben wir in ze chauffen geben Chu^enraten dem Tanpekchen, der zu den zeiten gesessen ist dacz der Roteneck und seiner hausfraun ver Katrein und allen iern erben umb ain genancz gu^et, dez wir gancz und gar von in gericht und gewert sein ze rechten tegen an allen schaden, und schu^ellen se den vorgenanten hof mit sant (sic) dem zehent darauf inne haben in nucz und in geber mit alle dev und dar zu geho^ert. Daz di red also stet und unverchert peleib, dar über so gib ich vorgenanter Chu^enrat der Schu^ecz von der Linden in disen prief versigelt mit meinem anhangunden insigel. Der sache und der wandelung sind geczeug mein sweher Weichart, der zu den zeiten gesezzen ist dacz des Ruspekchen hof, und sein sun Weichart mit ier paider anhangunden insigel in an schaden. Der brief ist geben dreuczehen hundert iar dar nach in dem neun und fu^enfczigestem iar an sand Florians tag.

Source Fulltext: OÖUB 7 (Wien 1876), S. 645f., Nr. 635