Ich Go^etfrid von Marichpu^erch vergich daz ich gegeben vnd gemacht han meim lieben o^ehaim hern Hansen von Chu^enigsperch vnd allen seinen erben allew meinew aignew^e gu^eeter die ich han vnd die hernach an dem brief geschriben stent. Dez ersten an dem Pacher ainew vnd dreizzich hueben vnd ze Raswach vierdhalb hueben vnd vier hofstet vnd zwo mu^el vnd darnach ze Cho^etsch zwo hueben vnd ain mu^el vnd ze Po^eschung zehen hueben vnd ze Ka/wtschach drei hu^/eeben vnd new/^n hofstet. Vnd darnach mein weinga^erten. Dez ersten den Posruker vnd den Sweiker den Pykrêr vnd den Gripsêr vnd den weingarten an dem Pacher vnd den weingarten ze Lu^eetenberch. Die vorgeschriben gu^eeter vnd weingêrten alle vnd auch alle die aigen gu^eeter die ich han wie die genant sind oder wo die gelegen sind alz die mein vodern vnd mein gebern vnd ich vnd mein erben in aigens gewer herpracht haben han ich alle gegeben vnd gemacht dem egenanten meim lieben o^ehaim hern Hansen von Chu^enigsperch vnd allen seinen erben gegen den aigen gu^eetern die mir derselb mein o^ehaim von Chu^enigsperch herwider gemacht hat vnd die gelegen sind in dem Sta/^ental bei Hekchenberch vnd bei Welen also mit ausgenomner red, wer daz ich vorgenanter Go^etfrid von Marichpurch an leiberben abgieng mit dem tod oder daz ich leiberben hinder mier liezz vnd daz die auch an leiberben abgiengen mit dem tod, waz wier dann der egenanten gu^eeter hinder vns liezzen, der sol sich dann der egenant mein o^ehem her Hans von Chu^enigsperch oder sein erben vnderwinden vnd su^ellen vnd mu^egen dann allen iern frumen damit schaffe. Wer aber daz in yemant engnu^ezz oder gewalt daran tu^on wolt, so sol sew der landesherr in Steyer oder wer den gewalt an seiner stat hat der vorgeschriben gu^eeter aller an nu^etz vnd gewer setzen, vnd sol sew darauf scherm vor allem gewalt. wer aber daz ich vorgenanter Go^etfrid von Marichpu^erch oder mein erben die vorgenanten gu^eeter von notdu^erft wegen nicht versparen mo^echten vnd daz wier die verchauffen oder versetzen wolden, so sol vns der egenant mein o^ehaim her Hans von Chu^enigsperch noch sein erben nicht daran engen in chainen wegen. Vnd daz die sach fu^erbas also stêt vnd vntzerbrochen beleib, darumb so gib ich vorgenanter Go^etfrid von Marichpu^erch dem oftgenanten meim o^ehem hern Hansen von Chu^enigsperch vnd allen seinen erben den brief versigelt mit meim anhangundem jnsigel vnd mit meins vettern Wilhalms von Wilchaus aigem anhangundem insigil vnd mit dez erbern chnechtz Vlreichs dez Snatergans aigem anhangundem jnsigil, die ich baid vleizzichleich darumb gepeten han daz sew der sach getzewgen sind mit iern jnsigilln. Der brief ist geben ze Marichpu^erch in der vesst nach Christes gepu^erd drewtzehen hundert jar vnd darnach in dem new/^n vnd fu^emftzigistem jar dez na^echsten eritags vor vnsêr vrow/^n tag ze der liechtmezz,

Source Fulltext: OÖUB 7 (Wien 1876), S. 610f., Nr. 602