Ich Hans von Reichenstain vergich offenlich mit dem brief vnd tu^on chunt, daz ich den erbern herren hern Eberhart von Waltse haubtmann ob der Ens oder sein eriben richten sol virtzig phunt geltes alter wienner phenning ze Reichenaw daz er von mir gechaufft hat, vnd desselben geltes sol vir vnd zwaintzig phunt phenning geltes ligen auf bestifftem guet behauster holden, vnd di sechtzehn phunt geltes auf cehent auf vberlent wie ich ez gehabt vnd auch ingenomen han, also sol ich in vnd sein eriben richten vnd weren an allez gever. Vnd mer gieng in an den vorgenanten virczig phunt phenning geltes ab daz di nicht gar da weren, swi vil dez wurd, so sol ich in abcziechen ie fur ain phunt phenning geltes sechczehen phunt phenning. Wer aber daz getan daz ich mer geltes ze Reichenaw hiet dann die obgeschriben virczig phunt geltes, so sol mir der vorgenant her Eberhart von Waltse geben ie fur ain phunt geltes alter wienner phenning sechczehen phunt phenning swi vil desselben geltes wirt, vnd fur ain igleich phunt geltes verlehentes guetes dreu phunt phenning, vnd swaz daz phenning macht mit ainer svmm des sullen si mich weren vnd richten auf di svnnbenten di nv schirst choment. Vnd auch mer, swann ich dem vorgenanten hern Eberhart von Waltse richtig mache di hantfest di den chauf sagent vber Reichenawe mit meiner swa^eger paider insigel hern Hansen von Wildungsmawr vnd Hainrich von Wartenfels, so sol er mir auf der stat guet machen oder sein eriben auf di vorbenant svnnbenten ze geben swaz er mir schuldig beleibt an dem chauf ze Reichenaw alz sein gegenbrief sagt den ich von im han. Darvber ze vrchund gib ich vorgenanter Hans von Reichenstain disen offenn brief besigelten mit meinem anhangunden insigel, der geben ist von Christi geburd dreuczehen hundert iar darnach in dem newn vnd funfczigisten iar des phintztags vor vnser vrawen tag ze liechtmiss.

Source Fulltext: OÖUB 7 (Wien 1876), S. 611f., Nr. 603