Wir Wemhart Vlrich vnd Hainrich vetern vnd brüder grafen von Schownberch bechennen mit dem offen brif, daz wir dem erbern mann Vlrichen dem Weidenholczer geben haben mit vnserm brif vollen gewalt, ze taidingen ze sprechen vnd ze enden von vnsern wegen mit den hochwirdigen bischof Gotfriden von Pazzow vnserm genedigen hern vmb al sto^ezz aufleuff chrieg vnd handlung, als si zden nehsten taidingen ze Euerdingen die wir mit ihm heten geöffnet vnd auch gemeldet sind worden, ez sey vmb häuser, grunt oder hölczer oder vmb welherley sache daz sey in aller der mazze, als wir zden nästen taidingen ze Euerding von im geschaiden sein. Vnd dar nach hat er gesprochen nach einer guten chuntschaft vnd gewizzen, nach der vmbsäzzen weisung die wir vnd vnser hochwirdiger herr bischof Gotfrid ze Pazzow baidenthalben darzu geschaffet haben, daz der mayrhof in dem Tal vnd die drey hofstet niderhalb dezselben hofes alles in dem burchfrid ligt ze Euerdingen, dann vmb die nidern padstuben vnd das erleych vnd das velbereich von derselben padstuben vncz auf den mülwerd, daz die allew vnsers genedigen herren bischof Gotfrids von Pazzow vnd auch dez gotshaus ze Pazzow sein süllen vnd auch sind mit grunt vnd mit holcz vnd mit alle die vnd dar zu gehört. Aber dieselb padstuben erleich vnd velbäreich die ligent nicht in dem rechten burchfrid ze Euerdingen vnd habent doch allew die recht, die ein yeglich burger ze Euerding gesezzen der stewrt vnd wachtt haben sol. Vnd auch also vnengolten vnsrer rechten auf derselben padstuben erleich vnd velbereich die wir vnd vnser vodern von dez landgerichts wegen darauf gehabt haben vnd noch darauf haben süllen, denselben spruch als er hie an dem brif gemeldet vnd geschriben stet, vnd als wir dez hinder den vorgenanten Vlrichen den Weydenholczer gangen sein, als oben geschriben stet, haben wir stät vnuersprochen vnd bestätten in auch mit vrchund dez brifs, den wir dar über geben zu einer sicherhait besigelten mit vnsern vnd dez vorgenanten Vlrichs des Weydenholczer anhangunden insigeln, der geben ist ze Schownberch an montag nach sand Pangracij tag nach Christs geburtt drewzehen hundert iar dar nach in dem newn vnd fumfczkistem iar.

Source Fulltext: OÖUB 7 (Wien 1876), S. 647f., Nr. 637