Wir Ru^odolff der Vierd von Gots gnaden phallencz erczberczog ze O^esterreich ze Steyr vnd ze Ka^ernden furst zu Swaben vnd ze Elsassen her ze Krain auf der Marich vnd ze Porttnaw vnd des heiligen ro^emischen reichs obrister ja^egermaister tu^on kunt, daz vnser getrewr lieber Gu^enther vom Hag maister des spitals am Piern vnser kapplan fur vns kam vnd bracht vns fu^er ein hantuest in latein geschriben, die vnser lieber vetter herczog Ru^odolf ze O^esterreich vnd ze Steyr herr ze Krain auf der Marich vnd ze Porttnaw selig dem vorgenanten spital gegeben het vnd bat vns, daz wir jm dieselben hantuest in deu^otsch machten vnd verschriben. das haben wir getan in der weis als hienach von wort ze wort geschriben steet: In namen der heiligen vnd vntailten driualtikait. Wir Ru^odolff von Gotes gnaden herczog ze O^esterreich vnd ze Steyr herr ze Krain der Marich vnd ze Porttnaw allen sam etc. (wie Urkunde ddo. Linz am 4. Aug. 1299. U.-B.Bd. IV, S.315.) Nu haben wir vorgenanter herczog Ru^odolff angesehen die gnad vnd begier die der egenant vnser vetter herczog Ru^odolff dem Got gnad zu demselben spital am Piern gehabt hat, vnd haben im durch vleissiger bet willen des obgenanten Gu^enthers vom Hag desselben spitals maister in namen vnd anstat vnsers selbers Fridrichs Albrechts vnd Leupolts vnsrer lieben bru^eder, der vollen vnd ganczen gwalt wir als der eltist vnder in haben, alle seine recht gnad freyung die da oben von wort ze wort begriffen sind, vernewet bewert vnd besta^et, vnd vernewn bewêrn vnd besta^etten auch. Darczu^e haben wir demselben spital am Pirn lautterleich durch Got vnd durch vleissiger pet willen des obgenanten Gu^enthers vom Hag sunderleich die gnad getan vnd tu^en auch, daz derselb Gunther oder swer desselben spitals maister ist, ia^erlich ain hyrssen iagen vnd vahen mag vnd sol vnd nicht mer. Darumb sol nyemant erlaubt sein, dieselben vnser bestêttung vnd vernewung vnd gnad vberuaren oder ier mit dhainer freuelr getu^erstichait widersein. Wer es daru^eber têtt, der sol wissen veruallen sein in vnser vngnad vnd darczu^o hundert phunt goldes ze wandel, der fu^emfczig phunt in vnser kamer vnd fu^enfczig phunt den di dauon beswa^ert sind werden vnd geuallen sullen. Diser sache sind geczeugen, die hernach geschriben sind vnd die dabey sind gewesen, die hochgeborn fu^ersten marggraf Meinhart von Brandemburg vnd herczog zu ober Payrn graf (zu) Tyrol vnd des heiligen ro^emischen reichs o^ebristen kamra^er vnser swaga^er vnd herczog Wenczla ze Sachsen graf ze Prên vnd des heiligen reichs o/^bristen marschalch vnser lieber o^ehem vnd die erwirdigen her Ortolf erczbischof ze Salczburg legaten des stuls ze Rom her Paul bischof ze Freysing her Gotfrid bischof ze Passaw her Johanns bestetter bischof ze Gurk vnser kanczla^er vnser lieben freund, vnd die edeln Meinhart von Gorcz vnser phallenczgraf in Ka^ernden Ott von Ortenburg vnser haubtman in Krain vnd auf der Marich, Johans von Phannberg vnser haubtman in Ka^ernden, Purchart der Elter, Perchtolt, Purchart der Ju^enger, Johans vnd Ott von Maidburg, Vlrich vnd Herman von Cili, Vlrich vnd Hainrich bru^eder von Schawnberg, Yban von Pernstain grafen, Stephan von Meissaw obrister marschalh vnd Albrecht von Pu^echaim obrister drugsecz in O^esterreich, Fridrich von Pettaw obrister marschalch, Ru^odolff, Ott von Liechtenstain von Mu^eraw obrister kamrer, Fridreich von Walsse o^ebrister schenk in Steyr, Fridreich von Aufenstain obrister marschalch vnd Herman von Ostrawicz o^ebrister schenkch in Ka^ernden, Herman von Landenberg lantmarschalh in O^esterreich, Eberhart von Walsse von Lincz vnser haubtman ob der Ens, Perchtold von Pergaw vnser hofrichter, Hainreich von Hakkenberg vnser hofmaister, Pilgreim der Strewn vnser hofmarschalch, Fridreich von Walsse von Drosendorff vnser kamermaister, Johans von Prunn vnser kuchenmaister, Hainreich von Prunn vnser schenk vnd Wilhalm der Schenk von Liebenberg vnser speizmaister vnser getrewn lieben vnd andrer erbrer la^eut genu^og die ze gegen waren, vnd darumb daz dise bewerung vernewung bestettung vnd gnad stete vnd vnzebrochen beleibe vnd ewicleich volfu^eret werde, haben wir disen brief haissen versigeln mit vnserm grossen anhangunden insigel. Der geben ist ze Wienn an phincztag nach sand Merteins tag nach Krists gebu^erd dreuczehenhundert iare darnach in dem new/^n vnd fu^emfczigistem iare vnsers alters in dem ains vnd zwainczigistem vnd vnsers gwalts in dem andern iare.

Source Fulltext: OÖUB 7 (Wien 1876), S. 669ff., Nr. 659