Ich Vlreich der Patoman vnd ich Mertt der Pawman sein vetter, Nichlas sun dez Pawmans seins pruder dem Got gnade, wir vergehen vnd tun chunt, das wir verchauft vnd geben haben vnsers rechten aigens vnsrew zwai lehen gelegen ze Seifritstorff vnde alles das daz zu den selben vnsern zwain lehen geho^eret, vmb ains vnd zwaintzich phunt wienner phenning der wir gar vnd gaentzleich gewert sein, dem erbern herren hern Hainreichen von Potendorff vnd seinen erben fu^erbas ledichleich vnd vreileich ze haben vnd allen iren frumen damit ze schaffen versetzen verchauffen vnd geben wem si wellen an allen irresal. Vnd daz diser chauf fürbas also stet vnd vnzerbrochen beleibe, darvber so gib ich Vlreich der Pawman dem obgenanten hern Hainreichen von Potendorf vnd seinen erben disen brief zu einem warn vrchunde diser sache versigilten mit meinem insigil vnd mit meiner vnd des egenanten meins vettern ohem insigiln Cholmans von Mannswerde vnd Seyfrits des Planchen von Mitterndorff vnd mit Chunrats insigil von Hasenekk des egenanten meins vettern ohem, die ditzs chauffs vnd diser sach gezeug sint mit iren insigiln. Der brief ist geben nach Christes geburd dreutzehen hundert iar darnach in dem newn vnd fu^emftzgisten iar an sant Katrein tage.

Source Fulltext: OÖUB 7 (Wien 1876), S. 674, Nr. 663