Wir Rudolff von Gots gnaden hertzog ze O^esterreich ze Steyr vnd ze Kernden tun kunt, daz wir vnsern getriwen lieben Eberharten von Kappell dem eltern vnd Annen seiner swester Johansen vnd Eberharten von Kappell geprudern Kunigunden vnd Elspeten irn swestern Vlreichs seligen weilent seins pruder sinen vnd tochtern vnd irn kinden svnen vnd to^echtern verlihen haben vnd leihen mit disem brief gemainlich vnd vnuerschaidenlich alle die lehen, die si von vns habent, si sein getailt oder vngetailt wa si gelegen oder wie si genant sint. Wir haben ouch den vorgenanten von Kappell die gnad getan vnd tun mit disem brief durch der getrewr vnd namlicher dienste willen, die sie vnsern uoruordern vns vnd vnsern prudern getan habent vnd furbaz tun sullent vnd mugent, wêre daz die egenanten von Kappell derselben lehenen dhaines getailt hieten oder hienach tailent wurden, daz in daz an der gemainschaft derselben leben chain schad sein sol, sunder beschech daz ir dhainer abgieng vnd sturb ane kind, swaz der lehenen von vns hat si sein getailt oder nicht, die sullent vallen vnd erben an die andern oder an ire kind, svne vnd tochtern in aller der mazz vnd mit allen den rechten, alz ob si gemain vnd vngetailt gewesen wêren an alle geuerd, mit solichem vnderscheide, daz die vorgenanten Eberhart der elter von Kapell vnd sein vettern Johans vnd Eberhart vnd ir aller svn dieselben lehen besiczen vnd erben sullen alle die weil, vnd man oder svne da sint. Wêre aber des Got nicht welle, daz man oder svn vnder in also abgiengen, daz ir dhainer mere nicht wêre, so sullen darnach dieselben lehen geuallen auf die obgenanten Annen Kunigunden vnd Elspeten vnd auf ire kint svn vnd tochter in aller der mazze als vorgeschriben stet ane allez geuêr. Mit vrchund dicz briefs der geben ist ze München an freytag nach vnserr vrawn tag als si geporn ward, nach Christes gepu^erd dreuczehen hundert iar darnach in dem sechczigistem jar. ||
+Wir der vorgenant herzog Ruodolf sterken disen prief mit dirr vnderschrift vnser selbs hant.+ ||
Et nos Johannes dei gracia Gurcensis episcopus prefati domini nostri ducis prirnus cancellarius recognouimus omnia prenotata.

Source Fulltext: OÖUB 7 (Wien 1876), S. 719f., Nr. 716