Ich Wendelmut Chunratz des Maywiser wittib dem Go^et genad vergich daz ich geschafft han daz geschafft daz hernach geschriben stet, zdem ersten so schaff ich meiner tochter Margreten gein Tyrnstain in daz chloster drew phunt ebigs purchrecht geltz auf dem haus daz da gelegen ist ze nachst des Vaisten haus, ez schullen auch die drew phunt geltz nach meiner tochter tot ebichleichen bey dem vorgenauten chloster beleiben. Ich schaffe auch meiner tochter daselbs vir phunt beraider phening. Darnach schaff ich meiner swester chind Margreten, daz der Vintzgut bey ym hat, zwainczig phunt phening. Darnach schaff ich ein Ro^em-vart vnd ein Ach-vart. Darnach schaff ich zwai phunt geltz auf dem haus vnd garten da der Chöchel inn ist gewesen auf dem graben, vnd auch auf siben chravtgaerten, di da sind gelegen hinder dem spital Man schol auch mir vnd meinen wirt alle iar jaerleichen begen vnsern iartag mit aim phunt datz der pfarr vnd mit aim phunt datz den bru^edern. Ich schaff auch meiner swester Margreten newn schilling geltz di man ir alli iar raihen vnd geben schol vntz an iren tod. der fumf schilling ligent auf dem haus vnd garten pey meinem pavngarten, vnd ain halb phunt geltz schaff ich ir von dem gelt den ich enhalb Tunaw han an dem vrfar auf dem halben haus, daz der Sibrein ist enhalb Tunawn, vnd hab auch geschafft fumf phunt phening meins wircz pruder chind vnd schaff auch ein chron vnd vingerl vnd gesperr vnd ein hafftel hintz den prudem zu einem khelich. Daz die redd vnd daz geschafft alle stat vnd vnczebrochen beleib, dar vber zw einen warn vrchund gib ich vorgenante Wendelmuet den prief versigelten mit hern Fridreichs dez Vngelter vnd mit hern Vlreichs dez Pirinhchleins anhangunden insigeln. Der prief ist geben drevczehn hundert iar vnd darnach in dem sechczkisten dez eritags an sand Michelstag.

Source Fulltext: OÖUB 7 (Wien 1876), S. 725f., Nr. 722