Wir Rudolf van Gots gnaden herczog ze O^esterreich ze Steir vnd ze Ka^ernden tu^en kund, das vo^er vns vnd vnnsern herren die ze den zeiten bej vns wo^eren erfunden vnd ertailt ist vmb die aribait vnd wanndlunge mit kaufmanschaft in dem dorffe enhalbem der Trawnprugk bej Gmunden ze gegenwu^ert vnnserm getrewen lieben Fridreichen von Waltsae von Enns, der derselben ertailunge vor vnnser gehollen hat also, das von alter gwonhait herko^emen sei, das die lewt gemainkleich in dem selben do^erffe enhalben der Trawnprugk kainer aribait noch wanndlung mit kaufmanschaft da pflegen sulln weder mit pratpachen noch mit lewtgeben noch mit sneidwerch noch mit schuchwerch noch mit kainerlay annder handtwerich noch wanndlunge wie das genant ist angeua^erde, vnd das auch dieselben kain freyunge da nicht haben sullen in kainen wege. Dauon wellen wir ernstleich, seind sich das also vor vnnser erfunden hat vnd des auch der vorgenant Fridreich von Walssae also hat gehollen, wer dann vnnder den egenanten lewten in dem vorgenanten dorffe ennhalben der Trawnprugk dieselben ertailunge v^eberfu^er vnd dawider ta^et, das sullen die burger von Gmunden bringen an den purggrauen ze O^erdt, das er das denselben burgern von Gmunden vnuerczogenleich wennde. Ta^et er des nicht, so haben wir den egenanten vnnsern burgern von Gmunden vollen vnd gantzen gewalt geben vnd geben auch, das sy das ernstleich vnd vestikleich pessern weren vnd wennden von vnnsern wegen, vnd geben jn daruber ze vrkunde disen brief versigelten mit vnnserm klainem anhangundem jnsigel. Der geben ist ze Vekchlaprugk an vnnser frawn abent ze der schiedunge nach Kristes geburde dreyczechen hundert jar darnach in dem sechczigistem jare. Dominus dux personaliter.

Source Fulltext: OÖUB 7 (Wien 1876), S. 711f., Nr. 709