Ich Levpolt von Weyzzenberch vergich fu^er mich vnd fu^er alle mein erben offenbar, daz ich ze chauffen han geben meinem wesundern frewnt Weycharten von Stharchenberch seiner hausfrawn frawn Annen vnd allen iren erben di lehenschaft vnd di manschaft di hernach geschriben stet, dez ersten den zehent dacz Revthaym vnd dacz Frideleiten in Pramchircher pfarr vnd den zehent auf dem Geyrhof vnd auf den zwayn guetern die darzu^e gehorent die gelegen sind in Rotenpecher pfar, vnd daz guet daz do haist dacz Aw gelegen in Weybarer pfarr das alles mein rechts aygen gewesen ist, vnd daz gelt dorvmb ich ym ez gegeben han hat er mich gancz vnd gar gericht vnd gewert vnd han ich yms auch vnd seinen erben aus meiner gewalt vnd gewerschaft geantwurt in di iren mit allen den rechten alzo ich di selb inne gehabt han, vnd pin auch der vorgeschriben gueter oder wye daz genant ist ier gewer fu^er allev ansprach. Vnd daz in daz alles sta^et von mier vnd von meinen erben weleib, gib ich den vorgenanten Weycharten von Stharchenberch vnd seiner vorgenanten hausfrawn vnd allen iren erben den brief versigelten mit meinen anhangundem jnsigel vnd mit dez erbern hern her Nyclas von Scha^eurbach ze den zeiten pfleger ze Wolfsekk anhangunden jnsigel, vnd vnder dez erbern ritters hern Dyetreichs von Aystershaym anhangundem insigel, di die durch meiner pet willen zu^e dem meinem gehangen habent ze einer zu^egnuzz vnd ze einer sta^etnu^ezz der sach in vnd allen iren erben an schaden, dorvnder ich mich verpint mit meinen trewen an aydes stat allez daz sta^et ze haben, daz vor geschriben stet. Daz geschach drevczehen hundert jar vnd darnach in dem segczgistem jar dez mytichen in den pfynstveirtagen.

Source Fulltext: OÖUB 7 (Wien 1876), S. 700, Nr. 696