Ich Fridreich von Waltse von Ens und ich Hainreich von Waltse sein prueder vergehen offenbar mit dem brief und tu^on chunt, daz wir unserm liebem vetern hern Eberharten von Waltse haubtman ob der Ens freyleich und vollen gewalt gegeben haben, umb unser lieben schwester Urseln zu beheyraten also, swi er diselb unser obgenante swester beheirat, daz wir im des in allen sachen gehorsam sullen sein mit worten und mit werkchen. Und swo wir daz in dhaim artikel indert uberfueren und im derselben sache auzgiengen, so hat er vollen gewalt uns darumb ze zu^osprechen und auch monen und vordem cze laisten, und nach der selben monung sulle wir im imvertzogenleichen vier erber rittermezzig chnecht jeden chnecht selberandern mit zwain pheriften inlegen ze laisten gen Lintz in ein erber offen gasthaus da in hin geczaigt wiert, und sullen diselben da innligen und laisten angever und nicht auzchomen, untzen daz di sache alz obgeschriben ga^entzleich volpracht und volfuert werd. Wir vergehen auch, daz unser vorgenante swester Ursel vertzeichbrief geben sol alz ander ir swester gegeben habent also, swenn daz ist daz si ze schulden chumt mit ierm wiert swer der ist den ir Got beschaffen hat. Daruber ze urchund gib ich vorgenanter Friedreich von Waltse disen offen brief besigelten mit meim anhangunden insigel, darunder ich mich obgenanter Hainreich von Waltse sein prueder verpint mit mein triwen allez daz stet ze haben und volfuern alz obgeschriben stet wand ich aygens insigels nicht enhan. Der brief ist geben von Christi gepu^ord dreuczehen hundert jar darnach in dem ains und sechtzigisten jar des mitichen vor sand Go^ergen tag.

Source Fulltext: OÖUB 8 (Wien 1883), S. 13, Nr. 14