Wir Ruedolff der vierde von Gotes genade herczog ze Ossterreich ze Steir ze Kernden herr ze Krain auf der Marich und ze Partenaw graff ze Habelspurch und ze Phfirt ze Kiburch margraff ze Purgaw und lantgraff in Elsassen wechenn und tun chund offenleich mit disem brieff, daz wir unssern getrewn lieben dem rat und den burigern gemainchleich ze Enns hingelassen haben und lassen auch unsser geriebt und mawt daselbs ze Enns mit allen nuczen und rechten als di von alltter herchomen sind, von den weinachten die nu schierist chomendt zwai gancze jar nach einander umb tawsent phfunt wienner phening, ye das jar umb fumhundert (sic) phfunt phfening der sy uns zu vier zeiten in dem jar richten und wern schullen als sitleich und gewondleich ist, wer aber daz sy icht sichtigen schaden daran nemen von urlewge von pisese oder von wellicherlay gebresten daz wescha^ech des (si) uns webeisen mochten, denselben schaden (wellen) wir gen in genedichleich erchennen, mit urchuad diczs brieffs, geben ze Wienn am vreitag vor phingsten nach Christi gepurde drewczehen hundert jar darnach in dem ain und seczkisten jar unssers alters in dem zwai und zwainkisten und unssers gwaltz in dem dritten jare. Wir der vorgenant herczog Ruedolff sterchen disen brieff mit dir underschrifft unsser selbs hant.

Source Fulltext: OÖUB 8 (Wien 1883), S. 18f., Nr. 19