Wir Ru^odolff von Gots gnaden hertzog ze O^esterreich ze Steyr und ze Kernden etc. tun kunt daz uns unser getrewer Peter von Fürstenfeld mit seinem brief hat aufgesant ein viertail an dem hof ze Swabaw und swaz darzu geho^ert daz ze lehen von uns ist, und bat uns daz wir das verlihen unsern lieben getrewen Fridereichen und Eberharten von Walsse vetern ab der Steyrmarich wan si dazselb von im gechouft hieten. Das haben wir getan und haben den egenanten Fridereichen und Eberharten von Walsse vettern und irn erben das vorgenant viertail an dem hof ze Swabaw und swaz darzu^o geho^ert verlihen und leihen ouch swaz wir im ze recht daran leihen sullen innezehaben und ze niezzen, alz lehens und landes recht ist, und sein ouch wir des ir scherm vor gewalt und vor unrecht. Mit urchund dicz briefs, der geben ist ze Wienn an Montag nach dem heiligen auffarttag nach Christs gepurd dreuczehen hundert jar darnach in dem ains und sechczigistem jar.||
Dominus dux.

Source Fulltext: OÖUB 8 (Wien 1883), S. 17f., Nr. 18