ICH Nykla der Goterga^ezzinger und mein eleichev hawsvrawe und all unser erben verjehen offenleich, daz wier haben dem erwirdigen edeln unserm gena^edigen herren graf Wernharten von Schaunberch und allen seinen erben ze chauffen gegeben mit rechter fu^erzicht unser und aller unser erben unser hueb ze Pokchhaim gelegen in Barchircher pharre pei Schauberch (sic), deu unser recht aygen ist von alter her aller unser vorvodern, umb zway und dreuzich phunt wienner phenning der wir gancz und gar von in gericht und gewert sein also mit der beschaiden, ob yem herfu^ercha^em der pezzar erb wolt sein ze der vorgenanten hueb den wier gewesen sein, und sew darumb anspra^ech mit dem rechten, so geb wir in auf der obgeschriben hueb ze Pokchshaim vier und sechczich phunt wienner ze einem rechten sacze nach dez landez recht ob der Enns, und sullen wier dann dez chauffez oder dez saczes swelhes si wellent ier recht gewern sein fu^er all ansprach an aller der stat in dez not geschicht nach daz landez recht ob der Enns. Daz in daz also sta^et unczebrochen beleib daruber ze einem warn vestem und sta^etem urchunde geben wier in den offenn brief versigelten mit meinen aygen obgenantcz Nykla dez Goterga^ezzinger anhangenden insigel, und ze einer pezzern sicherhait mit meiner lieben vreunt und gesellen Ramugs dez Chamerer und Ulreichs dez dru^ekchsa^eczen von O^ed ir paider anhangenden insigel, di si daran gehangen habent in an schaden, der brief ist geben nach Christi gepu^erd uber dreuczehen hundert jar darnach in dem ainz und sechczichistcn jar an sand Petronillen tag.

Source Fulltext: OÖUB 8 (Wien 1883), S. 23f., Nr. 26