Ich Hertneyd und ich Niclas ped pru^oder Pochings sün, dem Got genad und ich Hainreich der Vanstorffer und mit sampt uns alle unser erben wie die genant sind wir verjehen, daz wir recht und redleich zu chauffen haben geben unser gu^ot ze Wichendorf daz leben ist von Hertneyden dem Ka^etringer dem Leb Hainreichen ze Wichendorf und allen seinen erben umb aindlef phunt wy^enner phenning der sew uns gancz und gar gericht und gewert habent, also beschaidenleich, daz wir noch alle unser erben nach demselben gu^ot mer dhain ansprach sullen haben weder wenig noch vil. Wir sullen auch dezselben gu^ots ihr gewer sein fu^or allen ansprach nach lant recht ob der Enns. Na^emen sew aber darüber indert dhainen schaden von der gewerschaft wegen mit recht wie derselb schad genant wurde den sew pei iren trewen an ayde gesprechen mugen, denselben schaden mit sampt dem hawbtgu^ot sullen wir in gancz und gar ablegen und widercheren, und daz sullen sew haben dacz uns und unsern trewn und darzu^o auf aller unser hab und wir haben. Dacz die rede fürbas state und unverchert beleibe darüber geben wir ich Hertneyd und ich Niclas paide pru^oder und ich Hainreich Fanstorffer Leb Hainreichen und seinen erben den prief für uns und all unser erben zu^e einem waren urchu^ond der warhait, versigilten mit unsers frewnts Hainreichs des Fanstorff anhangunden insigel, wand wir ich Hertneyd und ich Niclas ped pru^oder aygens insigel nicht enhaben, und darumb verpinden wir uns mit sampt im under seinem insigel alles daz an dem prief geschriben stet state ze haben mit unsern trewen an alles geva^er, und durch pezzer gezewgnu^ezze willen mit Ha^ertneydes dez Hawczenpechen anhangenden insigel. Der prief ist geben nach Christi gepu^erde über drewczehenhundert jar darnach in dem zwai und sechczigisten jar an sand Michelstag.

Source Fulltext: OÖUB 8 (Wien 1883), S. 100, Nr. 98