Wir gemainchleich di pfarrlawt der pfarr ze sand Michel dacz Ranshofen verjeben offenleich an dem brif, daz wir ze chauffen geben haben hern Heinrich chorherren ze Ranshoven und auch techent ze den selben zeiten funf schilling o^ettinger pfenning ewigcz gelcz umb vier pfunt regenspurger pfenning der er uns gancz und gar gericht und gewert hat, und schullen wir di vorgenanten funf schilling pfenning jaerleichen raichen und geben den herren in daz chloster daselben auf sand Mychelztag, oder daz gelt daz dann gib und gaeb ist. Und wer derselben herren oblayer ist der schol auch dez selben gelcz ein halbz pfunt geben ja^erchleichen in ir oblay an unser frawentag so si empfangen wart, und schol auch di selb ho^echzeit davon lo^ebleich auf dem chor begangen werden . so schullen di ubrigen dreyzck pfenning gevallen in die gustrey den beiligen ze dem liecht. Wir verjehen auch, ob wir indert sawmig darinne waern daz doz vorverschriben gelt nicht geviell auf die vorgenanten vrist, so hat der oblayer vollen gewalt ze verpfenden di zechlaewt dacz sand Mychel alz lang und alz vil uncz daz er dez vorgenanten geltz gar und gancz gericht und gewert wirt. Si schullen auch mit uns tragen schawer pezez urleug und auch gemainen landez presten, da uns Got vor behueth, nach irr beschaiden alz an andern irn urbarn. Und daz in daz allez staet und unzebrochen beleib ze einem urchunt der worhait geben wir in den brif und under der zwayer erbern mann Ulreichen dez Chlinger ze denselben zeiten pfleger ze Purchawsen und vycztum in dem Weilhart und Chunradz dez No^etleich anhangunden insigeln versigelt. Daz ist geschehen do man zalt von Christez gepurd tawsent jar drew hundert jar und darnach in dem drew und sechczigistem jar an sand Peters und sand Paulz tag.

Source Fulltext: OÖUB 8 (Wien 1883), S. 147, Nr. 139