Ich Eberhart von Waltse ze Lintz und hawptman ob der Ens tun kunt mit dem prief fu^er mich und fu^er mein erben, daz mir der erwu^erdig fu^erst mein sunder gnediger herre byschof Fridreich ze Babenberg von gnaden enpholchen hat zu meinen trewen und ze trewer hant innzehaben sein vogtei uber sein lewt und gu^eter die er hat in der hoffmarch und in dem marcht ze Chu^erchdorff und in der hofmarch ze Gersten und in dem Gerstenthal also, daz ich im und sein gotzhaws dieselben lewt und gueter und swaz darzu geho^ert trewlich vogten schermen und versprechen sol von meiner vest ze Pernstein und nicht von der vest ze Chlaws, und sol die bei iren rechten behalten und beleiben lazzen als sei von alter herpracht haben an alles gewerde als lang, als er sein gotzhaws oder sein nachkomen byschoff ze Bawenberg uns der selben vogtei gu^ennen wellen, si mu^egen auch uns daran verberen swen si wellen, ze urchund geb ich den offen prief versigelten mit mein anhangendem insigel. Datum anno domini millesimo trecentesimo sexagesimo tertio (ccc lxiij) prima dominica post festum Andree appostoli.

Source Fulltext: OÖUB 8 (Wien 1883), S. 159f., Nr. 154