ICH Dyemu^et hern Hermans witib von Landenberch sa^elig ze den zeiten hofmaistrinne der hochgeboren fu^erstinne herczoginn Katrein ze O^esterreich ze Steyr und ze Ka^ernden vergich, daz ich mich frewntleich und gu^etleich verebent und verricht han mit meinen lieben su^enen Ru^egern und Berengeren den pru^edern von Landenberg nach ierer fleizzigen pet und auch nach ierer pesten trewnde rat umb die veste Rotenekke und umb alles das daz darzu geho^eret in urbar ze holcz ze velde und ze dorffe daz leben ist von unserm herren dem herczogen in O^esterreich und das ich in meiner hant gehabt han und ich gemacht und gegeben möcht haben wem ich wolte, und umb alles das ander gut daz der egenant mein wiert ier vater selig hinder im lazzen hat, und auch umb alles daz gut daz mich von vater und von muter seligen anerstorben ist also, das si mier aus denselben gu^etern allen ausgezaigt und gegeben habent ze einem leibgeding ze meinen lebtagen des gu^ets das von dem egenanten meinem wiert ierem vater hercho^emen ist, einen hof gelegen ze Manswerd und alles das, das darzu geho^eret ze velde und ze dorffe, und den satz viertzig pfunt wienner phenning geltes gelegen auf der mautt ze Stain die satz sind von unserm herren dem herczogen in O^esterreich. Darzu^e so sol ich haben ain drittall an der vest dacz dem Stain und alles das zu dem selben drittail geho^eret purchrecht perchrecht in urbar ze holcz ze velde und ze dorffe, daz recht aigen ist das auch mein rechts anerstarbens erb ist von meiner müter. Und einen weingarten gelegen in der Wochaw daz mein rechts anerstarbens erb ist von meinem vater also beschaidenleich, das ich die vorgenanten gu^eter den hof ze Manswerd und den satz die vierczk phunt geltes auf der mautt ze Stain und ein drittail an der vest dacz dem Stain und den wein garten in der Wochaw und was zu^e denselben gu^etern geho^eret, in nucz und in gewer sol innehaben unverchumert unez an meinen tode als leibgedings recht ist und des landes recht ze O^esterreich, und nach meinem tode so sülln denne die vorgenanten guter erben und gevallen auf die egenanten mein su^en Ru^egeren und Berengern von Landenberch und auf ier nachst erben an allen chrieg. Wer aber daz man den vorgenanten sacz lozt, so sol ich denne dieselben phenning mit der egenanten meiner sün wizzen wider anlegen an ander gu^et also, das ich dazselb gu^et auch in nutz und in gewer sol innehaben unverchu¬mert uncz an meinen tod als leibgedings recht ist. Und wer auch das, das ich daz egenant drittail an der vest dncz dem Stain und den weingarten in der Wochaw verchauffen wold, des sol ich volln gewalt und recht haben ze tun mit der beschaidenhait, daz ich denne die phenning darumb ich dieselben gu^eter verchauf wider anlegen sol mit der egenanten meiner su^en wizzen an ander gu^et das ich denne auch in nucz und in gewer sol inne haben auch als leibgedings recht ist, und das auch ez nach meinem tod auf die egenanten mein su^en erben und gevallen sol und auf ier erben in allen dem rechten, als vorgeschriben stet. Und darumb so han ich den egenanten meinen su^enen und ieren erben ledich lazzen und aufgegeben die vorgenanten vest Rotenekke und alles das darzu geho^eret, und auch alle die andern gu^eter die der egenant mein wiert ier vater hinder im lazzen hat, und auch alle die gu^eter die mich anerstarben sint von vater und von müter lewt und gu^et aygen lehen perchrecht purchrecht in urbar ze holcz ze velde und ze dorffe, also daz si dieselden gu^eter sülln fu^erbas ledichleich und vreyleich haben und allen ieren frumen damit ze schaffen wie in daz aller pest fu^eegt oder gevellet an allen chrieg, und sol auch ich si mit chainerlay sachen daran hinderen noch ierren weder vil noch wenich. Und das disew richtigung und sache furbas also stet und unzerbrochen beleibe daruber so gib ich in disen brief ze einem waren urchund diser sache versigilten mit meinem insigil und mit der erbern herren insigiln meiner o^ehaym hern Eberharts von Walsse hauptman ob der Ens und hern Leutolten von Stadekke ze den zeitn lantmarschalich in O^esterreich und mit meins aydems insigil hern Ortliebs von Winchel bei der Tüenaw. Der brief ist geben nach Christes gebu^erd drewzehen hundert jar darnach in dem drew und sechczgisten jar an sand Symons und an sand Judas abent der zwelifboten.

Source Fulltext: OÖUB 8 (Wien 1883), S. 157ff., Nr. 152