Ich Perchtolt der Ponhalm vergich, . . . daz ich . . . gemacht und gegeben han durch meiner vorvordern sel und durch meiner sel willen meinen weingarten ze Rozzas an dem Niederstain gelegen zenachst Prewnreichs weingarten, und der auch dient vier und viertzig phenning wyenner munzze ze purchrecht, und ain gu^et ze Waytarn in der Wis genant da zwo hofstet ingeho^erent da zu^e den zeiten Dietel der Po^echrel aufgesezzen ist und daz auch freyes aygen ist und dient auch newn schilling wyenner phenning die gib und gaeb sind, dem spital ze Steyr zu^e einer hilffe umb ain ewigew messe in daz spital also beschaidenleich, daz ich noch alle mein erben nach dem vorgenanten weingarten und nach dem gu^et daz oben verschriben ist nimmer mer dhain ansprach schullen haben ewichleich . . . Daz die gelu^eb und die tayding also furbas staet und unverchert beleiben daruber gib ich Perchtolt der Ponhalm den purgern ze Steyer gemainleich armen und reichen den prief an dez spitals stat fu^er mich und alle mein erben . . . versigelten mit meinem anhangunden insigel, und mit dez erbern ritter hern Niclasen des Schekchen ze den zeiten purgraf ze Steyer und mit Michels des Scherer ze den zeiten statrichter ze Steyr anhangunden insigeln. Der prief ist geben nach Christi gepu^erde uber drewtzehen hundert jar darnach in dem vier und sechtzgisten jar an dem pluemo^estertag wenn man singt Domine ne longe.

Source Fulltext: OÖUB 8 (Wien 1883), S. 170f., Nr. 166