ICH Haynreich von Emphyng und ich Katrey sein hawsfraw wier vergechen mit sampt allen unser erben, daz wier mit aller unsrer erben gu^etleichem willen und wort gesaczt haben Elspeten der Vo^ekchin und ieren chinden unser wizz gelegen zw Gryeking dew unser rechtz aygen ist und ist genant dew Prukwizz mit allen den nutzen und dar zve geho^ert um syben phunt allter wiener phenning der wier gar und gantz von in gericht und gewert sein, darum wier di obgenanten wizz um di vor verschryben phenning ledigen und lo^esen schullen alle jar jaerchleich an unser frawn tag zw der lyechtmes vor acht tag oder hinnach ynner acht tagen. Wier vergechen auch daz bier der ob genanten wizz und dez satz dar auf ir recht gewer schullen sein swo in dez no^et geschiecht, nach dez lantz recht ob der Ens. Daz in di red von uns also staet und unverchert beleib, daruber zw aym ba^ern urchund gib ich in vor genantter Hainreich von Emphyng und mein erben den prief versigellt mit meinem anhangundem insigell. Der prief ist geben nach Chrysty gepu^erd uber drewtzehen hundert jar darnach in dem vier und sechtzkysten jar an dez heyligen herren sand Mertens tag.

Source Fulltext: OÖUB 8 (Wien 1883), S. 198, Nr. 194