ICH Stephan von Hohenberch vergich, daz ich mit meins lehenherren hant des hochwirdigen fu^ersten hern Albrechts bischof ze Pazzow^e recht und redleich ze einem widerwechsel gegeben han hern Fridreichen dem marschalich von Pappenhaym und seinen erben meins rechten lehens das ich von dem egenanten meinen herren dem bischof und von seinem gotzhaus ze lehen gehabt han, di manschaft eines drittails des dorfzehents ze Inningen, minrr acht und dreizzig jeuch, das Ulreich und Wernhart die Roedler von O^ed von mir ze lehen gehabt habent mit alle dem nutz und rechten als ich die man¬schaft desselben drittail zehents in lehens gewer herpracht han also, daz der egenant her Fridreich von Pappenhaim und sein erben damit sullen fu^erbas allen iren frumen schaffen. Da engegen so hat er mir und meinen erben auch ze einem widerwechsel gegeben seins rehten lehens das er von dem egenanten bisckof Albrechten und von dem gotshaus ze Pazzaw ze lehen gehabt hat die manschaft des gantzen zehents gelegen ze Tewffenpach ze Reichgreben und an der Wisen, den Jans der Syrnikcher und Jacob im Planpach von im ze lehen gehabt habent also, daz ich und mein erben die manschaft desselben zehents sulln fu^erbas ledichleich und vreileich haben und allen unsern frumen da mit schaffen an alle irrung. Und bin auch ich und mein erben der manschaft des vorgenanten drittails des dorf¬zehents ze Inningen an acht und dreizzig jeuch als vor benant ist des obgenanten hern Fridreichs von Pappenhaim und seiner erben recht gewern und scherm fu^er alle ansprach als lehens recht ist und des landes recht ze O^esterreich. Und daru^eber so gib ich in disen brief zu^e einem waren urchu^ende der sache versigilten mit meinem insigil und mit meins suns insigil Stephans von Hohenberch und mit hern Andres insigil von Liechtenstein obrister chamrer in Steyr. Der brief ist geben nach Christes gepurde dreutzehen hundert jar darnach in dem vier und sechczgistem jar an sant Cholmans tage.

Source Fulltext: OÖUB 8 (Wien 1883), S. 191f., Nr. 188