Wir Ru^odolff der vierd von Gotes gnaden erczherczog ze O^esterreich ze Steyr ze Kernden und ze Krayn herre auf der Wynndischen marich und ze Porttnaw graf ze Habspurch ze Tyrol ze Phyrtt und ze Kyburg margraf ze Purgow und lantgraf in Elsazzen bechennen und tu^on chunt offenlieh mit disem brief fu^er uns selber, unser bru^eder und fu^er all unser erben, daz wir angesehen und betracht haben die grozzen trew^e und begird die unser lieber getrewr Eberhart von Walsse von Lyncz unser hauptman ob der Ens und sein gesiecht ye zu uns und zu unsern vordern gehabt habent, und auch den enczigen (in R. Strein: embsigen) dienst den si uns und denselben unsern vordern oft und dikch habent getan darumb si ouch gro^ezlich und erberlich begabt sind, und haben demselben Eberharten von Walsse von Lyncz durch der egenanten seiner enczigen (in R. Strein: embsigen) dienst willen die er uns also getrewlich und stetichlich getan hat und noch fu^erbazz wol getu^en mag und sol von besundern gnaden empholhen und vollen gewalt geben und geben auch, daz er und sein erben ein newe vest gepawen mugen und sullen auf den perch genant der Chlausperch der da leit ob der Chlausmu^el in dem Po^esenpach wie in das aller peste chomet und fu^eget an all irrung, die si von uns ze lehen emphangen habent und auch fürbazz ewichleich von uns unsern bru^edern und erben ze rechtem lehen erkennen sullen. Und wan der erwirdig name dez egenanten geslechts Walsse yecz und nyndert ist in unserm lande ze O^esterreich von vesten wegen, darumb haben wir dieselben newn vest genant Walsse der wort, daz derselb name Walsse nicht vertilgt noch des vergezzen werde, sunder daz des also ewichleich in unsern landen werde gedacht. Darczu haben wir in die gnad getan daz freyung in derselben newn vest Walsse sein sol umb all erber sache; swer dahin flu^echtig wirt umb erlich sache, daz der gancze freyung da haben sol ausgenomen dem der wider uns unser bru^eder oder unser erben und nachkomen frevelich tet, der sol da chain freyung haben; swer aber die egenanten freyung daru^eber zepreche und da wider tet (in) dhain weise, der sol vervallen sein hundert phunt goldes, der fu^emfczig phunt gevallen sullen in unser chamer und fumf und zwamczig phunt dem egenanten Eberhart von Walsse seinen erben oder seinen nachkomen und die ubrigen fumf und zwainczig phunt goldes dem der schad und der gewalt widervarn ist. Diser sache sind geczewgen der durchlewchtig fu^erst her Peter chu^enig ze Jherusalem und ze Cy^eper unser lieber o^eheim, die hochgeborn fu^ersten herczog Wenczla von Sachsen und herczog Walthasar von Brunswig ouch unser lieben o^eheim, die erwirdigen her Johans byschof ze Brichsen unser lieber fu^erst und kanczler her Peter byschof ze Marcopel ze den zeiten weichbyschof in Pazzawer bystum, die ersamen abt Johans ze Melkch abt Clemens ze den Schotten ze Wienn, die edeln unser lieben o^eheim graf U^elreich von Schownberg und unser getrewen lieben graf Ulreich von Cyli hauptmann in Chrain Stephan von Meissow obrister marschalh Haydenreich von Meissow obrister schenk Alber von Pu^echhaim obrister drugsezz Peter von Eberstorff obrister chamrer Wilhalm von Chreuspach obrister jegermaister Leutolt von Stadekk lantmarschalh in O^esterreich Kadolt von Ekharczow der elter Hainreich von Rappach unser hofmaister Hans von Lozperg unser chamermaister Wilhalm der Schenkch von Liebenberg unser speismaister Eberhart der Chastner unser hofschenkch Hainreich der Prenner unser chuchenmaister und vil ander herren ritter und chnecht. Und des ze urchund und ewiger gedechtnuzz geben wir disen brief besigelten mit unserm grozzem furstlichem insigel. Geben ze Wienn an mitichen vor aller heiligen tag do man zalt von Christs gepurd drewcehen hundert jar darnach in dem vier und sechczigistem jar unsers alters in dem fumf und zwainczigistem und unsers gewalts in dem sibenden jar. ||
+ Wir der vorgenant herzog Ruodolf sterken disen prief mit dirr underschrift unser selbs hant. +

Source Fulltext: OÖUB 8 (Wien 1883), S. 194ff., Nr. 191