Wir grefin Margret von Phannberg graf Johanns von Phannberg witu^eb und alle unser erben wir verjehen, daz wir reht und redleich ze chauffen geben haben unserm lieben vettern graf Ulreichen von Schawenberg und allen seinen erben unser haus ze Wienn gelegen ze nahst seinem haus umb hundert und zwainczigk pfunt wienner pfenning der wir gancz und gar von in geriht und gewert sein, do mit wir uns verzigen haben und verzeihen auch mit dem brief aller rehten und ansprach die wier an dem egenanten haus gehabt haben. Wir haben in auch daz egenant haus geben mit allen den rehten eren und nu^eczen und dar zu gehoret besucht und unbesuecht oder swie daz genant ist, alz wir ez und unser vorbenanter wirt seliger graf Johanns von Phannberg in nucz und in gewer her pracht haben. Mit urkund dez briefs den wir in darüber geben versigelten mit unserr egenanten grefin Margreten aygem anhangundem insigel versigelt und mit unsers schaffer Fridreichs von Haymschach insigel versigelt. Der brief ist geben am sampcztag nach sand Gregorytag in der vasten do man zalt nach Christi gepurt tausend drewhundert jar und darnach in dem fumf und sechzigistem jare.

Source Fulltext: OÖUB 8 (Wien 1883), S. 216, Nr. 212