Wir Ru^odolff von gots gnaden herczog ze O^esterreich ze Steyr ze Kernden und ze Krayn graf ze Tyrol etc. bechennen und tu^en chunt offenlich mit disem brief fu^er uns und die hochgeborn fürsten herczog Albrecht und herczog Leupold herczogen und herren der egenanten lande unser lieb pru^eder, umb den frid den der durchleuchtig fu^erst unser lieber pru^oder herr Ludweig ku^enig ze Ungern gemachet hat zwischen uns an aim tail und herczog Stephan von Payern dem eltern und seinen sonen und herczog Albrecht von Payern des egenanten herczog Stephans pru^oder an dem andern tail uncz auf den nechsten sand Jahans tag ze sunwenden, daz wir ain lengerung desselben frides mit den egenanten herczogen von Payrn aufgenomen haben von demselben sand Johans tag uncz auf sand Merten tag der darnach schirist chunftig ist, und den tag allen mit allen den punten artikeln und stukchen als der frid vormals auf sand Julians tag gemachet was und die briefe weisent die daruber geben sind an alle geverde. Mit urchund dicz briefs, der geben ist ze Wienn an dem palmtag nach Christs gepurd drewczehen hundert jar darnach in dem fu^emf und sechczigistem jar.||
+ Hoc est verum. + (Des Herzogs eigene Handschrift.)

Source Fulltext: OÖUB 8 (Wien 1883), S. 221f., Nr. 218