Ich Chonrat der Tanpech und all mein erben wir vergehen, daz wier . . . ayn widerwegzzel haben geben unserm liben gna^edigen herren hern Ruegern von Storhenberch und allen sein erben dy hie geschriben stent, dy zway gueter dacz Pawgarten und daz gu^et dacz Puechirchen und den zehent auf den zwain guetern dacz Pawgarten chlain und grozzen und daz allez gelegen ist in Helmeisöder pfarre, haben wier in geben mit allen eren rechten und nu^etzen dy darzw geho^erent umb dy zwen ho^ef dacz Sa^ewring, dy do ligent in Kaspolczhofer pfarre und umb den zehent auf zwain ha^ewsern in dem Ruderspach nidem an dem Ortt gelegen in Helmeisöder pfarre also, daz wir di selben gw^eter schullen nuczen und ynnhaben in aller der mazz und unser lieber herr her Rueger von Storhenberch und sein erben yn hat gehabt, und schol dann unser vorgenanter lieber herre her Rueger von Storhenberch und all sein erben dy vorgenanten zway gu^eter dacz Pawgarten und daz gu^et dacz Puechirchen und den zehent auf den zwain guetern dacz Pawgarten chlain und grozzen auch ynn schol haben und nuczen mit allen den eren rechten und nu^eczen dy darzw geho^erent. Wa^er aber daz fu^erbaz indert prief herfu^er cha^emen, ez wa^er von mein wegen oder von meiner erben wegen ez waern sa^ecz oder chawf dy auf di gueter sagent auf dy zway gut dacz Pawgarten und auf daz gut dacz Puchirchen oder auf den zwain guetern dacz Pawgarten chlain und grozzen yndert herfuer chemen von welicherlay sach daz wa^er oder fu^egt, dy selben prief schu^ellen tod sein und dhain chrafft nicht haben mit dem gegenwu^ertigen prief, wa^er aber daz in an dem selben oder an der gewerschafft icht abgieng mit rechtem lancz recht, wietan schaden si dez nement, den su^ellen si haben dacz uns und dacz unsern trewn und auf aller unser hab wo wir di haben. Und daz selb allez sta^et und unverchert fu^erbaz weleib, so gib ich unserm libem herren hern Rugern von Storhenberch und allen sein erben ich vorgenanter Chonrat der Tanpech und all mein erben den prief versiglt mit meim anhangundem insigel und versigelt mit meinez libem swager Chonracz purchgrafen von Wezzenberch anhangundem insigel und mit dez erbern chnechtz Wernhers dez Nymmerfol zden zeiten purgraf ze Lobenstain anhangundem insigel, der geben ist do man zalt von Christi gepurd drewzehen hundert jar und in dem sechgzz und sechizgkistem jar an sand Gregori tag.

Source Fulltext: OÖUB 8 (Wien 1883), S. 269f., Nr. 271