Wier Meingoz chorherr von Pazzawe und Ortolf brüder von Waldek verjehen, daz wier haben ze chauffen geben unserm bruoder Hadmarn unsrew zwai tail an dem vodern turn ze Wesen der emoln unser dreier waz, und alle die la^eut die uns anerbent von unser mueter swo die sint, und allez daz urbar innerhalb der Antlang und der Aschach untz an die Tunawe in Schaumbergergericht verschuocht und unverschuocht umb zwai hundert pfunt und umb zwelif pfunt pazzawer pfenning, und haben im gelobt daz wier dez vorgenanten guotes sin gewern schullen sein fur alle ansprach alz in disem lande recht ist, also mit beschaidner red, daz wier auz nemen swaz uns furbaz anerbunt wiert von unsern vodern fuer den tag hint, da tvon wier chain fuerzicht nicht auffe. Daz disiv red stät beleib und unzebrochen, geb wier im disen prief zainer urchund versigelt mit unsern hangnunden insigel. Dez sint ziug her Sifrid der Frumesel her Gotscholich von Volchenmarcht her Christau von Geyselperig der Ortolf von Morspach der Alram von Rotawe Hainreich von Oed Ortolf der Lauterprunner Ulrich der Aichperiger Wernhart der Tanpeche. Diser prief ist geben do von Christez geburd worn vergangen tausent jar und drey hundert und secz jar und in dem sechzsten (sechzigsten) jar an sand Gregorn tag tatz Schaerding.

Source Fulltext: OÖUB 8 (Wien 1883), S. 270, Nr. 272