ICH Philipp und ich Marchart paideu prueder di Koethringer und alle unser erben verjehen, daz wir ze chauffen haben geben den erbern vrawen herrn Jansen witiben von Chunrring dem Got genad, vrawen Annen und vrawen Ursula ier swester hern Gundachers witiben von Ponhaim (sic pro Polnhaim) dem Got genad, und allen iren erben unserrew drew gu^eter di mit namen her nach geschriben stent: dez ersten den halben hof ze Sygretting gelegen in Hoedigenisperiger pfarr, und di tzwai gu^eter datz dem Dorflein da Ulreich der Flader auf sitzt und da Hainreich der Locher auf sitzzt in Wolfarer pfarr, umb sibentzich pfunt wienner pfenning der wir gantz gericht und gewert sein, di haben wir in geben mit alle den nutzen und rechten und darzu geho^ert, und sullens auch inne haben und niezzen als wirs inn gehabt haben von alter herchomen sint (sic) und die lehen sint von den edelen fursten in Osterreich. Ich Philipp der Kathringer und ich Marchart sein prueder und alle unser erben sullen und wellen der obgenanten gueter ir scherm und ir gewer sein fur alle ansprach wo in dez nöt und durfft geschicht nach landes recht in Osterreich ob der Ens . . . Und dez zu einem sichtigen waren urchund geben wir ich obgenanter Philipp und Marchart di Koettringer in den offen brief versigelten mit unser paider anhangunden insigeln wolbestettigt; und durch pessrer sicherbait willen mit unsers lieben vetern Nyclas dez Ka^ettringer und Hertneitz dez Hautzenpechen paider anhangunden insigeln. Der brief ist geben do man zalt von Christi geburd dreutzehen hundert jar und in dem sehs und sechtziksten jar an sant Michels tag.

Source Fulltext: OÖUB 8 (Wien 1883), S. 293f., Nr. 298