Ich Stephan von Münspach ich Katrey seine hausfraw mitsampt uns all unser erbn wir verjechen, daz wir gelten schullen unsern ochaim Weycharten dem Zellhofer und Petrein dem Zelhofer und Jans und Wolfharten irn prüdern und all irn erbn czway hundert phunt und dreyzich phunt alter winner phennig, darfur zu ainer pessern sicherhait haben wir in gesaczt dew hab dew mit nam hernach geschriben stet, unsern hof der da haist der Hyertleins hof und drey hofstet dapey und Chranöd und ain gu^et dacz dem Chren und ain zechnthaus auf dem Perchfrid und ains auf dem Rigelleins, dacz Obernperg zway, ains hinterm holcz ains dacz Starazzer lechn und auf der Oed dapey und zway dacz Mautterlechn, dew hab ist allew gelegen in Zeller pharr und ain güt in Tragewner pharr dacz dem Zerz im Rewt und ain güt in Schonawer pharr daz dem Pleycholbn und ain zechenthaus dacz Tyrolczhof und ains dacz Zeydelhof und ein wizz bey der chlain Nerren, de hab ist allew lechen von unnserm genedigen hren hern Eberharten von Chappelln; dew schullen sew in haben mit alle den nuczzen und eren und rechten de darzu gehörent und davon bechommen mugen versucht und unversucht sam sacz recht ist im land in Osterreich. Iz ist auch dez sacz lasung alle jar jerleich acht tag var phingsten und acht tag hinnach. sew schulln auch alln irn frum schaffen mit dem sacz sam sacz recht ist im lant in Osterreich. Daz dy rede stet und unverchert peleyb daruber gib ich vorgenanter Stephan in den prief zu einer warn urchunt versygelt mit meinen anhangunden insydel, dez sind zewg mein veter Haydenreich im Stainhech und Perchtolt der Lanczzendorffer mit ier payder anhangunden insygeln. Der prief ist gebn do man zalt von Christ gepurde drewczehen hundert jar darnach in dem sechs im sechczigsten jar am phingst abentt.

Source Fulltext: OÖUB 8 (Wien 1883), S. 279f., Nr. 283