ICH Aekkerl der Wolfzfurter mein hausfrow und all unser erben verjehen, daz wir verchauft haben sechs schilling geltez gelegen auf ainem guet ze Wakkerspach in Aeverdinger pfarr und haizzet am Aygen mit allen eren rechten und nu^etzen, und wir daz in aygens gewer unversprochenlichen her pracht (haben), also haben wir daz recht und redleich ze chauffen geben den edelen wolgeporen unsern lieben gnaedigen herren graf Ulreichen und graf Hainreichen gepruedern grafen ze Schawnberch und iren erben umb a^eht pfunt wyenner pfenning, der wir von in gantz und gar berih und gewert sein. Und dez ze ainem warn urkund und ze ainer sicherhait geben wir in den brief versigelt mit meins obgenanten Aekkerl dez Wolfzfurter insigel und mit Hansen dez Chyrichperger insigel. Der geben ist ze Schawnberch nach Christes gepurd dreutzehen hundert jar darnach in dem sechs und sechtzigsten jar dez mittichens in den pfingstveyrtagen in der kottember.

Source Fulltext: OÖUB 8 (Wien 1883), S. 281, Nr. 284