ICH Anna Chu^enratz dez Harder witib beillen purger ze Wels dem Got gnad, und ich Steffan und ich Pawl paid prueder ier su^enn und all unser erben wier vergehen, daz wier mit aller unser erben gu^etleichen willen und wort recht und redleichen gesatzt haben dem edellen und unserm gnaedigen herrn graf Hainreichen von Schawnberkch und allen sein erben unsern hof ze Ratenolpholter, der unser satz gebesen ist von Ruegern dem Schiffer mit allen den ern und nuczen und rechten alz wier in cze satz inne haben gehabt cze holcz cze veld und cze do^erf, auz unser nutz und gewer in dy iren, um an ayns dreiczk phunt aller wienner phenning der hier cze rechten taegen gar und gancz von in verricht und gewert sein also weschaidenleich, daz hier lo^esu^eng schullen haben alle jar jaerchleich vor unser vrawen tag cze der lichtmez vierczehen tag oder hinnach inner vierczehen tagen wan bier daz für mugen. (sic) Wier sein auch dez vor verschriben satz ier furstant und ier recht gewer, swo in dez no^et geschiecht. Daruber cze aim born sichtigen urchund geben hier in den prief vesigelten mit dez erbern mans Dyetreichs dez jungen Hawnoltz cze den czeiten statrichter ze Wels anhangnnden insigill, und mit unser lieben vreunt anhangunden insigell Hainreichs dez Harder purger cze Wels und Hainreichs dez Lanchseyten czw den czeiten statrichter cze Lincz. Darunder wier uns mit sampt allen unsern erben mit unsern trewn verpinten allez daz staet cze halten daz vor verschriben ist, wan bir cze der selben czeit aygen insigell nicht enhaten. Der prief ist geben nach Christez gepurd uber drewczehen hundert jar darnach in dem siben und sechczkisten jar dez vreutags nach sand Merteins tag.

Source Fulltext: OÖUB 8 (Wien 1883), S. 347f., Nr. 356