Wir Albrecht und Leupolt gebru^eder von Gotes gnaden herczogen ze O^esterreich ze Steyr ze Kernden und ze Krain grafen ze Tyrol etc. tu^en chunt, wan wir unserm lieben getrewen Ru^odolfen von Walsse von Ens gelten sullen hundert phunt wienner phenning die wir im geschaffet hetten hintz dem Syrfeyer von sundern gnaden und die im da nicht wurden, und gab uns wider den briefe den er darumbe von uns hett. Dartzu^o sein wir im schuldig hundert phunt phenning die wir im geschaffet haben zu^e sein selbs leibe in dem dienste den er uns des gegenwu^erttigen acht und sechczigisten jars gen Rom oder anderswohin gen Italy tu^en sol mit vier und dreizzig hauben gu^ots Volks sechs gancze maned nach einander, haben wir fu^er dieselben zwaybundert phunt phenning die wir im also gelten süllen in und unser getrewn Symonn den Venken und Otakern von Wolfstain sein mitgescholn von unserm juden Waruchen von Lyncz gelediget und gelo^eset umb zwaihundert phunt phenning und umb zehen phunt phenning und swas gesu^ochs daraufgegangen ist also, swas derselbe jud sein hausfrawe oder ir erben darumb brief habent, daz die tod und absein und chain kraft haben noch den egenanten Ru^odolfen von Walsse noch den vorgenanten seinen mitgescholn noch allen iren erben von denselben juden noch von allen iren erben zu^o dhainem schaden komen. Mit urchund dicz briefs geben ze Wienn an samztag vor sand Jörgen tag nach Kristes gepu^erde drewtzehenhundert jar und darnach in dem acht und sechczigisten jare.||
Wehinger magister camere.

Source Fulltext: OÖUB 8 (Wien 1883), S. 375f., Nr. 382