Wir Albrecht und Leupolt bru^eder von Gotes gnaden herczogen ze Osterreich ze Steyr ze Kernden und ze Krain grafen ze Tyrol etc. wir Johans von denselben gnaden byschof ze Brichsen des obgenanten unsers lieben herren herczog Albrecht kanczler wir graf Ulreich von Schownberg ich Fridreich von Walsse zu den zeiten lantmarschalich in O^esterreich ich Haidenreich von Meissow^e obrister schenk in O^esterreich ich Hans von Liechtenstain von Nikolspurg ich Wolfgang von Winden zu den zeiten meins gnedigen herren des egenanten herczog Albrecht hofmaister ich Stephan von Topel zu den zeiten meins vorgenanten gnedigen herren herczog Leupolts hofmaister und ich Reinhart der Wehinger zu den zeiten des vorgenanten meins herren herczog Albrecht kamermaister und alle unser erben wir verjehen und tu^en kunt offenlich mit disem briefe, daz wir unverschaidenlich schuldig sein und gelten sullen Daviden dem Steiczzen dem juden ze Wienn Helmlein sun von Newnburg und seinen erben drew^e tausend guldein der vierlay mu^enzz, ungarisch behemisch judenburger und ducaten gu^et und wol gewegen, und siben hundert phunt wienner phenning der wir si aller miteinander unverczogenlichen weren sullen von dem heutigen tage als der brief gegeben ist uber ain jar, tu^en wir des nicht, so sol denn fu^erbaz gesu^ech darauf gen auf ein jegleichen guldein ain wienner phenning und auf ein jegleich phunt wienner phenning vier phenning wienner mu^enzze alle wochen, und wenne si nach der egenanten frist des vorgenanten irs gu^ets houptgu^ets und schadens nicht lenger peiten wellent, so sullen wir si des genczlich richten und weren wenn si es an uns vordernt an alle vercziechnu^ezze und widerrede. Tu^en wir des nicht, welhe si denne under uns manent und vordernt, der sol ainer auf den andern nicht waygern sunder ir igleicher sol denne einen erbern knecht selb andern mit zwayn pherten des nechsten tages darnach ze Wienn in ain erber gasthaus senden wa in die vorgenanten juden oder ir erben hin czaigen, und sullen die da innligen und laisten als innligens und laistens recht ist, und sollen da nimmer auzkomen uncz daz die vorgenanten juden oder ir erben des obgenanten irs gu^ots hauptgu^ots und schadens gar gewert werden, das loben wir in ze laisten mit unsern trew^en an allez geverd. Es wechsset ouch der gesuch nach dem egenanten zile, man laist oder nicht als vorbescheiden ist. Si sullen ouch houptgu^ot und scha^eden haben auf uns unverschaidenlich und auf allen unserm gu^ot wa wir das haben wie so das genant und wa das gelegen ist da von in die landesfursten in den landen und gepieten dieselben unsrew^e gu^eter gelegen sind an allez fu^erbot an alle klag und gerichte phande anttwurten sullent wa die obgenanten juden oder ir erben darauf zaigent wenn si des nicht lenger enpern wellent als verre, daz si des vorgenanten irs gu^ots houptgu^ots und schadens gancz und gar davon verrichtet und gewert werden wir sein lebentig oder tode. Wir die vorgenanten herczog Albrecht und herczog Leupolt fur uns und unser erben loben die obgenanten unser mitgulten und purgeln und ir erben von allem schaden darin si von des egenanten gelts wegen chomen mo^echten genczlich ze bringen an alle geverde. Und daruber ze ainem waren offenem urkunde aller der vorgeschribenen sache geben wir in disen brief versigelten mit unsern anhangenden insigeln. Der brief ist geben ze Wienn nach Christs gepurde drew^ezehen hundert jar darnach in dem acht und sechczigistem jare an sand Jo^erigen tage.

Source Fulltext: OÖUB 8 (Wien 1883), S. 376f., Nr. 383