Wir Albrecht von Gotes gnaden herczog ze O^esterreich ze Steyr ze Kernden und ze Krain graf ze Tyrol etc. tu^on chunt, daz wirunsern getrewn den purgern ze Ens die gnad getan haben und tu^on ouch, daz si durch die egenanten unsere land und uber die Zeyrich gefu^eren mugen welhischen wein von dem tag alz der brief geben ist uncz an unser widerru^effen, doch also daz uns von denselben weynen unser mautt gevalle als sitlich und gewo^enleich ist an unsern mauttstetten, und daz ouch dieselben purger von Ens die rechten und gewo^enlichen strazze damit varen daz uns unser mautt davon nicht verfurt werde. Darumb gebieten wir unsern getrewn lieben, den diser brief geczaigt wirt und wellen ernstlich, daz si die vorgenanten unsere purger von Ens dy egenanten welischen wein also furen lazzen durch die obgenanten unsere land und uber die Zeyrikch und in an der vorgenanten unsrer gnad chain ierrung noch beswerung tun in dhain weise, alle die weil wir die nicht widerrufft haben. Mit urchund dicz briefs. Geben ze Ens an sand Andres abent des zwelifbotten anno domini millesimo trecentesimo sexagesimo octavo.

Source Fulltext: OÖUB 8 (Wien 1883), S. 400, Nr. 405